चीनमा कोरोना भाइरसबाट १७ को मृत्यु

चीनको बुहान सहरबाट फैलिएको कोरोना भाइरसबाट १७ जनाको मृत्यु भएको स्वास्थ्य अधिकारीले जनाएका छन्।

नेपाल समय | बिहीबार, माघ ९, २०७६

नेपाल समय

बिहीबार, माघ ९, २०७६

चीन– चीनको बुहान सहरबाट फैलिएको कोरोना भाइरसबाट १७ जनाको मृत्यु भएको छ।

स्वास्थ्य अधिकारीका अनुसार बुधबारसम्म संसारभर ५८२ जनामा यो भाइरसको संक्रमण देखिएको छ, जसमा ५७१ चिनियाँ छन्।

यो भाइरस बुहानस्थित हुवानान होलसेल सिफुड मार्केटबाट मान्छेमा सरेको थियो। त्यसपछि चीनमा फैलिएको यो भाइरसको संक्रमण थाइल्यान्ड, हङकङ, मकाउ, ताइवान, अमेरिका, जापान र दक्षिण कोरियामा देखिएको छ।

भाइरस संक्रमण फैलिएपछि यसले विश्वव्यापी रूप लिने भन्दै चिन्ता व्यक्त गरिएको छ। तर, विश्व स्वास्थ्य संगठनले भने यसले विश्वव्यापी रूप लिने खतरा नभएको जनाएको छ।

यसैबीच, कोरोना भाइरसको संक्रमण बढ्न थालेपछि चीन सरकारले बुहानमा सार्वजनिक यातायात सेवा बन्द गराएको छ। बिहीबार बिहानदेखि त्यहाँका बस, रेल, विमानस्थल, होटल, रेस्टुरेन्ट बन्द गरिएका छन्।