घुस लिएको अभियोगमा इन्टरपोलका पूर्वप्रमुख जेल चलान

एजेन्सी- घुस लिएको अभियोगमा अन्तर्राष्ट्रिय प्रहरी सञ्जाल इन्टरपोलका पूर्वप्रमुख मङ खोङवे जेल चलान भएका छन् ।

पदमा रहँदा आर्थिक अनियमितता गरेको अभियोगमा चीनको एक अदालतले उनलाई १३ वर्ष जेल सजाय सुनाएको हो ।

‘पदीय मर्यादाविपरीत घुस लिएको अभियोगमा मङलाई अदालतले १३ वर्ष ६ महिना जेल सजाय र ९० हजार अमेरिकी डलर जरिवाना तोकेको छ । अदालतले एक विज्ञप्ति जारी गर्दै मङले आफूमाथि लागेका सबै अपराधलाई स्वीकार गरेको जनाएको छ ।

सन् २०१८ मा इन्टरपोलको प्रमुख रहेकै समय फ्रान्सबाट चीन गएको समय उनी बेपत्ता भएका थिए । उनको अवस्थाबारे सर्वत्र चासो बढेपछि सरकारले उनलाई नियन्त्रणमा लिएको पुष्टि गरेको थियो ।

चीनको सार्वजनिक सुरक्षा उपमन्त्रीसमेत रहेका मङले २० लाख अमेरिकी डलरभन्दा बढी घुस लिएको अदालतसमक्ष स्विकारेका थिए । मङमाथि व्यक्तिगत फाइदाका लागि पद दुरुपयोग गरेको अभियोग लागेको छ ।