एमएम कपको उपाधिका लागि आर्मी र पुलिस भिड्दै

काठमाडौं - सुनसरीमा जारी मनमोहन मेमोरियल (एमएम) एक दिवसीय क्रिकेट प्रतियोगिताको उपाधिका लागि विभागीय टोलीहरु त्रिभुवन आर्मी क्लब र नेपाल पुलिस क्लब भिड्दै छन्। इनरुवा क्रिकेट मैदानमा आज (शनिबार) ९ बजेबाट सुरु हुने खेलमा आर्मी र पुलिस उपाधिको दौडमा हुने छन्।

आर्मीको टोलीलाई विनोद भण्डारीले कप्तानका रुपमा सम्हालीरहेका छन् भने पुलिस क्लबको कप्तानमा मन्जित श्रेष्ठ रहेका छन्।

बुधबार भएको पहिलो सेमिफाइनलमा आर्मीले प्रदेश ३ लाई पराजित गर्दै फाइनल प्रवेश गरेको थियो। उसले प्रदेश ३ लाई ६४ रनले हराउँदै फाइनल यात्रा तय गरेको हो।

त्यस्तै बिहीबार सम्पन्न दोस्रो सेमिफाइनल खेलमा पुलिसले सुदूरपश्चिमलाई ९९ रनले पराजित गर्दै फाइनलमा स्थान पक्का गरेको थियो।

प्रतियोगिताको विजेताले ४ लाख ५ हजार तथा उपविजेताले २ लाख ५ हजार रुपैयाँ पुरस्कार पाउने छन्। प्रतियोगिताको उत्कृष्ट खेलाडीले ५५ हजार प्राप्त गर्ने छ। यस्तै उत्कृष्ट बलर र ब्याट्सम्यानले जनही २१ हजार प्राप्त गर्नेछन्।