बार्सिलोनाले १७ वर्षपछि हटायो बीच सिजनमा प्रशिक्षक

एजेन्सी– स्पेनिस फुटबल लिगको साविक विजेता बार्सिलोनाले प्रशिक्षक अर्नेस्टो भालभर्डेलाई बर्खास्त गरेको छ । भालभर्डेका ठाउँमा उसले नयाँ प्रशिक्षक क्वीक सेटिएनलाई प्रशिक्षक बनाएको छ ।

बार्सिलोनाले हालैमात्र यसको जानकारी दिएको छ । ला लिगामा अहिले पनि शीर्ष स्थानमा रहेको बार्सिलोनाले पछिल्ला पाँच खेलमध्ये एकमा मात्र जित निकालेको छ ।

प्रशिक्षक भालभर्डेलाई बार्सिलोनाले १७ सालपछि आधा सिजनबाटै पदबाट बर्खास्त गरेको हो। क्लबले १७ वर्ष पहिला पनि कोचलाई पदबाट बर्खास्त गरेको थियो । सन् २००३ मा लुइस वान जाललाई हटाइएको थियो ।

बार्सिलोनाले भनेको छ, ‘बार्सिलोना र भालभर्डेले आपसी सहमतिमै सम्झौता समाप्त गरेका छन् । नयाँ प्रशिक्षक सेटिएन र क्बबीच ३० जुन २०२२ सम्मको सम्झौता भएको छ । स्पेनीस फुटबलमा सेटिएन अनुभवी कोच हुन्।’

सेटिएनको कोचमा पहिलो खेल ग्रेनाडासँग छ। ६१ वर्षे सेटिएनको प्रशिक्षणमा पहिलो खेल आइतबार ग्रेनाडासँग हुन लागेको हो । घरेलु मैदान क्याम्प नाउमा हुने पहिलो खेलमा उनले प्रशिक्षण गरेका खेलाडी मैदानमा उत्रनेछन् । त्यस्तै च्याम्पियन्स लिग अन्तर्गत बार्सिलोनाले अर्को महिना नेपोलीका विरुद्धमा खेल्नेछ ।

नयाँ प्रशिक्षकका साथ बार्सिलोना आउँदो मार्चमा ‘एल क्लासिकोका लागि तयार हुनेछ । सेटिएनको प्रशिक्षणमा पछिल्लो सिजनमा रियल ब्याटिस ला लिगाको छैटौं स्थानमा थियो ।

पछिल्लो दुई सिजनमा बार्सिलोनाले खराब प्रदर्शन गर्दै आइरहेको छ । यो सिजनको आधा खेल सकिँदासम्म लिगको शीर्ष स्थानमा रहेको क्लबको मात्र ४० अंक थियो । यो अंक विगत १३ वर्षयताकै नराम्रो मानिएको छ । उनको कोचिङमा बार्सिलोनाले गत साल रोमाविरुद्ध नराम्रो हार व्यहोरेको थियो । त्यसपछि सन् २०१९ मा पनि लिभरपुल विरुद्धको खेलमा बार्सिलोनाले सेमी फाइनलमा हारको नतिजा स्वीकार गर्नु परेको थियो ।

यो सिजन पनि सुपर कपमा निरासा हात लागेको छ । बार्सिलोनाले अघिल्लो सेमीफाइनल खेल हारेको छ । उसले जारी लिगको तेस्रो स्थानमा रहेको एट्लेटिको म्याड्रिडसँग ३–२ गोलले हारको सामना गरेको थियो ।

उनको समयमा बार्सिलोनाले हार मात्र व्यहोरेको चाहिँ होइन । भालभर्डेको कोचमा बार्सिलानाले दुई ला लिगा र एक कोपा डेल रे जितेको छ ।