ओली-प्रचण्डको शक्ति संघर्षले संसद् बन्धक

काठमाडौं- सत्तारुढ नेकपाले सभामुखको उम्मेदवार चयन गर्न नसक्दा करिब एक महिनादेखि संसद् बन्धक बनेको विषयलाई आजका पत्रपत्रिकाले मुख्य समाचार बनाएका छन् ।

पुष ४ गतेबाट बोलाइएको हिउँदे अधिवेशन, ११, १६ र २७ गते लगातार सूचना टाँसेर स्थगित गरिएको छ । बैठक स्थगित हुनुको एउटै कारण हो, नेकपाले सभामुखको उम्मेद्वार छान्न नसक्नु ।

प्रधानमन्त्री तथा नेकपा अध्यक्ष केपीशर्मा ओली र अर्का अध्यक्ष पुष्पकमल दाहाल प्रचण्डबीचको शक्ति संघर्षका कारण सभामुखकाे उम्मेदवार छनोट हुन नसकेको आजका पत्रपत्रिकाले लेखेका छन् ।

यसै विषयलाई मुख्य समाचार बनाउँदै आजको कान्तिपुर दैनिकले संसद् बन्यो गुटबन्दीको बन्धक शीर्षकमा खबर छापेको छ ।

आवरणमा उपसभामुख शिवमाया तुम्बाहाङ्फेले राजीनामा नदिएको कारण देखाइए पनि अन्तर्यमा दुई अध्यक्षको शक्ति संघर्षका कारण संसद् बन्धक बनेको समाचारमा उल्लेख छ ।

उसले लेखेको छ- जननिर्वाचित प्रतिनिधिहरूको एकमात्र वैधानिक थलो संसद् सत्तारूढ प्रमुख दल नेकपाका दुई अध्यक्ष केपी शर्मा ओली र पुष्पकमल दाहालको गुटबन्दीको बन्धक बनेको छ ।

आवरणमा उपसभामुख शिवमाया तुम्बाहाङ्फेले राजीनामा नदिएको भनी कारण देखाउन खोजिए पनि अन्तर्यमा दुई अध्यक्षबीचको शक्तिसंघर्षको छाया प्रतिनिधिसभामा प्रकट भएको हो ।

मुख्यतः संसद् सरकारको बिजनेसबाट चल्छ । त्यसैले संसद्लाई सहज रूपमा सञ्चालन गर्ने दायित्व सरकार र त्यसको नेतृत्व गरिरहेको संसदीय दलको हुन्छ ।

तर प्रधानमन्त्री ओली र सत्ताको नेतृत्व गर्दै आएको दल नेकपाका ‘कार्यकारी’ अध्यक्ष दाहाल आन्तरिक विवादमा रुमल्लिइरहेका छन् । जसका कारण प्रतिनिधिसभा बैठक सूचना टाँसेर स्थगन गरिँदै आएको छ ।

पुस ४ मा संसद्को हिउँदे अधिवेशन सुरु भएपछि ११ र १६ गते सूचना टाँसेर स्थगित भएको बैठक आइतबार पुनः माघ ६ गतेसम्मका लागि सारिएको छ ।

आइतबारको बैठकसमेत स्थगित गरिएपछि प्रमुख विपक्षी कांग्रेस, समाजवादी, राजपालगायत दलले संसद्लाई सत्तारूढ दलको गुटबन्दीको सिकार बनाएको टिप्पणी गरेका छन् ।

यस्तै अन्नपूर्ण पोस्ट्ले एक महिना संसद् बन्धक शीर्षकमा खबर छापेको छ । यस्तै उसले गलिनन् तुम्बाहाङ्फे उपशीर्षक दिएर खबर लेखेको छ ।

नागरिक दैनिकले ओली दाहाललाई तुम्बाहाम्फे चुनौती शीर्षकमा मुख्य समाचार छापेको छ । यस्तै नयाँ पत्रिकाले पार्टीले सभामुखको उम्मेदवार नतोकेसम्म राजीनामा नदिने उपसभामुखको अडान शीर्षकमा खबर लेखेको छ ।

संसद् बन्धनक बनेको विषय बाहेक आजको कान्तिपुरले राजनीतिक आडमा क्रसर व्यवसायीले गरेको मनपरीलाई प्राथमिकताका साथ छापेको छ भने अन्नपूर्ण पोस्ट्ले जुम्लाको चन्दनाथ गुठीको १०८ रोपनी जग्गा व्यक्तिले हडपेको विषयलाई प्राथमिकताका साथ छापेको छ ।

नागरिक दैनिकले सरकारले बजेट खर्च नै गर्न नसकेको विषयलाई प्रथमिकताका साथ छापेको छ । चालु आर्थिक वर्षमा सरकारले ४ खर्ब ८ अर्ब रुपैयाँ विकास बजेट खर्च गर्ने लक्ष्य राखेको थियो । तर, ६ महिनाको अवधीमा जम्मा ५२ अर्ब रुपैयाँ मात्रै खर्च भएको छ।

नयाँ पत्रिकाले भने छाउगोठविरुद्ध सरकारले अभियान चलाएपछि स्थानीय देखिएको त्रासलाई मुख्य समाचार बनाएको छ । उसले छाउगोठमा बस्दा सरकारको डर, घरभित्र पस्दा देउताको डर शीर्षकमा खबर लेखेको छ ।