दबाब थेग्‍न नसकेपछि उपसभामुख राजीनामा दिने तयारीमा

काठमाडौं- पार्टीका शीर्ष नेताहरुले चर्को दबाब दिएपछि अन्ततः उपसभामुख शिवमाया तुम्बाहाङ्फेले पदबाट राजीनामा दिने तयारी गरेकी छन् ।

नेकपाको सचिवालय बैठकले शनिबार औपचारिक रुपमा तुम्बाहाङ्फेलाई पदबाट राजीनामा दिन निर्देशन दिएको थियो । उनले राजीनामा नदिएकै कारण सभामुखको उम्मेदवार छनोट गर्न नसकिएको निष्कर्ष निकाल्दै तत्काल राजीनामा गर्न उनलाई भनेको थियो ।

सोहि निर्देशनबमोजिम उनले राजीनामा गर्ने मनस्थिति बनाएकी हुन् । यद्यपी उक्त निर्देशन औपचारिक रुपमा तुम्बाहाङ्फेसम्म नपुगेको उनको सचिवालयले जनाएको छ। पत्र आएपछि थप प्रक्रिया अघि बढाउने तयारी भएको छ ।

उपसभामुखले पत्रकार सम्मेलन गरेर राजीनामा गर्नुपर्ने अवस्थाबारे पत्रकार सम्मेलनकै आयोजना जानकारी गराउने मनस्थिती बनाएको स्रोतले बताएको छ। यसअघि पनि उपसभामुख तुम्बाहाङ्फेले आफूले राजीनामा गर्नुपर्ने कारण माग गर्दै आएकी थिइन् ।

उनले तत्कालिन सभामुख कृष्णबहादुर महराले गरेको गल्तीको शिकार आफूलाई बनाउन खोजिएको भन्दै आपत्ति जनाउँदै आएकी थिइन् । बिना गल्ती सजाय दिन खोजिएको उनको भनाइ छ ।

महरा गएको असोज १९ गते संसद सचिवालयमा कार्यरत महिला कर्मचारी बलात्कार गरेको आरोपमा पक्राउ परेका थिए । उनीविरुद्धको मुद्दा काठमाडौं जिल्ला अदालतमा विचाराधिन अवस्थामा छ भने महरा डिल्ली बजार कारागारमा छन् ।