उपसभामुख तुम्बाहाङ्फेको राजीनामा माग्ने नेकपाको निर्णय

काठमाडौं- संघीय संसद अन्तर्गत प्रतिनिधिसभाको सभामुख उम्मदेवार टुंगो लगाउन बसेको सत्तारुढ सत्तारुढ नेपाल कम्युनिस्ट पार्टी (नेकपा) ले उपसभामुख डा. शिवमाया तुम्बाहाङफेको राजीनामा माग्ने निर्णय गरेको छ।

नेकपा अध्यक्षसमेत रहेका प्रधानमन्त्री केपी शर्मा ओलीको निवास बालुवाटारमा शनिबार बसेको सचिवालयको बैठकले उपसभामुख तुम्बाहाङ्फेको राजीनामा माग्ने निर्णय गरेको हो।

साथै बैठकले नेकपाले सभामुख पदका लागि उम्मेदवारी दिने निर्णयसमेत गरेको छ। यद्यपि सभामुखमा कसलाई उठाउने भन्नेबारे भने निर्णय गरिसकेको छैन।

बैठकपछि प्रवक्ता नारायणकाजी श्रेष्ठले सभामुख पदमा नेकपाले उम्मेदवारी दिने निर्णय गरेको बताए। प्रवक्ता श्रेष्ठले भने, ‘त्यसका लागि उपसभामुख पदमा हाम्रो पार्टीबाट निर्वाचित हुनुभएका शिवमाया तुम्बाहाङफेले राजीनामा दिनुहुनेछ।’

गत असोजदेखि प्रतिनिधिसभाको सभामुख पद रिक्त छ।

सभामुख कसलाई बनाउने भन्ने विषयमा सत्तारुढ नेकपाभित्र छलफल जारी भए पनि ठोस निर्णय हुन सकेको छैन।

निर्णय हुन नसक्दा प्रतिनिधिसभाको बैठक नियमित कार्यसूचीमा प्रवेश गर्न सकेको छैन। प्रतिनिधिसभाको बैठक आइतबारका लागि बोलाइएको छ।

नेकपामा पूर्व एमालेहरुले पूर्व सभामुख सुबास नेम्वाङलाई नै सभामुख बनाउनुपर्ने बताउँदै आएका छन् भने पूर्व माओवादीहरुले अग्नी सापकोटालाई सभामुख पदका लागि अघि सारेका छन्।

यसबारे नेकपाका अध्यक्षद्वय ओली र पुष्पकमल दाहालबीच पटकपटक छलफल भए पनि दुबैजना आफ्नो अडानबाट टसमस नहुँदा अझै सहमति जुट्न सकेको छैन।

उता उपसभामुख तुम्बाहाङ्फेले पनि पद नछोड्ने बताउँदै आएकी छन्।