जाउलाखेललाई हराउँदै मछिन्द्र शीर्षमा

काठमाडौं– कतार एयरवेज सहिद स्मारक ‘ए’ डिभिजन लिगमा मछिन्द्र क्लब शीर्ष स्थानमा उक्लिएको छ।

शनिबार जाउलाखेल युथ क्लबलाई १–० ले हराउँदै मछिन्द्र अंकतालिकामा शीर्ष स्थानमा पुगेको हो। मछिन्द्रका लागि खेलको ३१ औं मिनेटमा विशाल राईले गरेको गोल निर्णायक बन्यो।

यससँगै मछिन्द्रको अंकतालिकामा १३ अंक पुगेको छ। यसअघि मछिन्द्र १० अंकसहित तेस्रो स्थानमा थियो।

यसअघि अंकतालिकामा १२ अंकसहित शीर्ष स्थानमा रहेको त्रिभुवन आर्मी एक स्थान तल झरेको छ। यस्तै, मनाङ मस्र्याङ्दी पनि एक स्थान तल झर्दै तेस्रो स्थानमा पुगेको छ। मनाङको ११ अंक छ।

थ्री स्टार १० अंकसहित चौथो र जाउलाखेल ९ अंकसहित पाँचौं स्थानमा यथावत छन्।

जारी खेलबाट जाउलाखेलको अपराजित यात्रामा पूर्णविराम लागेको छ। यसअघि लिगका पाँच खेलसम्म जाउलाखेल अपराजित थियो। उसले लिगका ५ खेलमध्ये २ मा जित र ३ मा बराबरी खेलेको थियो।