प्रदेश २ का राज्यमन्त्री मण्डलको आरोप, ‘मन्त्री विलासी भए’

जनकपुरधाम- प्रदेश २ लाई समृद्ध बनाउन हरेक निकाय गम्भीर हुनुपर्ने आवाज उठिरहेको बेला सोही प्रदेशका एक राज्यमन्त्रीले सरकारका मन्त्रीहरु नयाँ गाडी खरिद गर्न चाजोपाजो मिलाइरहेको खुलासा गरेका छन्।

प्रदेश सरकारका उद्योग, पर्यटन वन तथा वातावरण राज्यमन्त्री सुरेशकुमार मण्डलले सरकारका मन्त्रीहरु नयाँ गाडी खरिद गर्न लागेको खुलासा गरेका हुन्।

राज्यमन्त्री मण्डलले जनताको हकहितका लागि सिन्कोसमेत भाच्न नसकेका मन्त्रीहरु विलासिताका लागि नयाँ गाडी खरिद गर्न लागेको बताएका छन्। मण्डलले आफ्नो फेसबुक पेजमार्फत यस्तो खुलासा गरेका हुन्।

शुक्रबार उनले लेखेका छन्, ‘एख वर्षअघि किनेको गाडी पुरानो भएको छैन। गाडीको अवस्था पनि ठीकै छ। प्रदेशको कामकाज गर्न काफी छ। बक्यौता रकम तिर्न बाँकी छ। तर नयाँ गाडी किन्ने तयारी भइरहेको छ।’

राज्यमन्त्री मण्डलले कतिपय मन्त्रीहरु गाडीको मोडल हेर्न ब्रोसर पल्टाउँदै दिन बिताइरहेको टिप्पणी गरेका छन्।

मण्डलले दोस्रो चौमासिक बित्न केही दिनमात्र बाँकी रहँदासमेत हालसम्म नयाँ योजना र कार्यक्रम बन्न नसक्नु दुर्भाग्यपूर्ण रहेको बताउँदै गत आर्थिक वर्षको उपभोक्ताहरुको समस्या समाधान हुन नसक्नु दुःखद रहेको उल्लेख गरेका छन्।

राज्यमन्त्रीलाई छल गरेर जनताको पैसा फजुल खर्च गरिएको उनले बताएका छन्।

राज्यमन्त्री मडलले आफ्नो फेसबुक पेजमा राखेको धारणा १७ मिनेटपछि हटाएका थिए। मण्डल राजपाबाट मन्त्री बनेका हुन्।