छैटौं राष्ट्रिय घोडचढी सम्पन्न

काठमाडौं – छैटौं राष्ट्रिय घोडचढी प्रतियोगिता (नेसनल इक्वेष्टेरियन च्यापियनसिप) टँुडिखेलमा शुक्रबार सम्पन्न भएको छ।

तीन विधामा सम्पन्न प्रतियोगितामा टेन पेकिङ, शोजम्प र हाइजम्प रहेका थिए। जसमध्ये हाइजम्प तर्फ खिलध्वज खड्का (गणेश), रामबहादुर दाहाल (सम्मोहन) र सविन कुमार पाखेरेल (आकांक्षा) क्रमश: पहिलो, दोस्रो र तेस्रो भए। त्यसैगरी शोजम्प तर्फ योगबहादुर बस्नेत (देवकी), लालबहादुर कुँवर (लमजुङ) र रामबहादुर दाहाल (सम्मोहन) क्रमशः पहिलो, दोस्रो र तेस्रो भए। प्रतियोगिताको अर्को विधा टेन पेकिङमा रुद्रबहादुर कार्की, गोविन्दबहादुर खड्का र लक्ष्मण रावल क्रमश: पहिलो, दोस्रो र तेस्रो भए।

प्रदर्शन खेल अन्तरगत महिला राइडरहरुलाई प्रोत्साहन वापत जनही पाँच हजार प्रदान गरिएको थियो। यसरी पुरस्कृत हुनेमा हरिमाया गुरुङ, शारदा केएम, कविता थापा र सरिता श्रेष्ठ रहेका थिए।

प्रतियोगितामा २६ राइडरको सहभागिता रहेको थियो। सबै विधामा प्रथम, दोस्रो र तेस्रो हुने विजेतालाई जनही २० हजार, १५ हजार र १० हजार पुरस्कार प्रदान गरियो।

कार्यक्रमको प्रमुख अतिथि नेपाली सेनाका प्रधानसेनापति पूर्णचन्द्र थापा रहेका थिए।