प्रदेश २ लाई हराउँदै पुलिस मनमोहन कपको सेमिफाइनल प्रवेश

काठमाडौं- विभागीय टोली नेपाल पुलिस क्लब मनमोहन स्मृति कप एकदिवसीय क्रिकेटको सेमिफाइनल प्रवेश गरेको छ।

सुनसरीको इनरुवामा जारी खेलमा शुक्रबार भएको समूहको अन्तिम खेलमा प्रदेश २ लाई ४६ रनले पराजित गर्दै पुलिस सेमिफाइनल प्रवेश गरेको हो।

खेलमा टस हारेर ब्याटिङको निम्तो पाएको पुलिस ४८ ओभर एक बलमा १ सय ८३ रनमा अलआउट भयो।

पुलिसका लागि दिपेन्द्र सिंह एरीले अर्धसतक पुरा गरे। उनले ६४ बलमा २ छक्का र ५ चौकाको मद्दतमा ५० रन पुरा गरेका हुन्।

त्यस्तै अमित श्रेष्ठले ३७ रनको योगदान गरे भने अनिल साहले १९ रन जोडे।

प्रदेश २ का लागि कुमार थापाले सर्वाधिक ५ विकेट लिए। त्यस्तै प्रताप सिंह र विवेक यादवले २–२ विकेट लिए।

जवाफी ब्याटिङमा आएको प्रदेश २ जम्मा ४२.२ ओभरमा अलआउट भयो। उसका लागि विशाल शुस्लिङले अर्धसतक प्रहार गरे।

उनले ५ छक्का र ८ चौकाको मद्दतमा ८० रन जोडे। त्यस्तै हरिशंकर शाहले १८ तथा हसिम अन्सारीले १० रन जोड्नु बाहेक अन्य ब्याट्सम्यानले राम्रो प्रदर्शन गर्न सकेनन्।

प्रदेश २ लाई सस्तैमा समेट्न ललित भण्डारी र दीपेन्द्र सिंह ऐरीले ३–३ विकेट लिए भने पवन शरार्फले २ विकेट लिए। त्यस्तै ललित राजवंशी र सागर ढकालले १–१ विकेट लिए।