ललितपुर र चौतारा फाइनलमा

काठमाडौं - आयोजक ललितपुर महानगरपालिका र चौतारा नगरपालिका महानगर कप भलिबल अन्तर्गत पुरुषतर्फको उपाधिका लागि भिड्ने भएका छन्।

जावलाखेल भलिबल प्रशिक्षण केन्द्रमा बिहीबार भएको सेमिफाइनलमा जित निकाल्दै ललितपुर र चौतारा फाइनल पुगेका हुन्।

चौताराले पहिलो सेमिफाइनलमा महालक्ष्मी नगरपालिकालाई ३-१ को सेटमा पराजित गर्यो। चौताराले महालक्ष्मीलाई २५-१४, ३५-३३, १८-२५ र २५-१७ को सेटमा पराजित गर्यो।

दोस्रो सेमिफाइनलमा कमलामाई नगरपालिकालाई ३-० को सेटमा पराजित गर्दै ललितपुर पनि फाइनलमा पुगेको हो। ललितपुरले कमलामाईलाई २५-१५, २५-१५ र २५-८ को सेटमा पराजित गर्दै चौतारासँगको भेट पक्का गरेको हो।

महिलातर्फको उपाधिका लागि चन्द्रागिरी नगरपालिका र ललितपुर महानगरपालिका भिड्ने छन्।

महिला र पुरुष दुवैको फाइनल खेल शुक्रबार हुनेछ।

प्रतियोगिताको महिला र पुरुष दुवैको विजेताले २ लाख, उपविजेताले १ लाख र तेस्रोले ५० हजार पाउने छन्। यस्तै चौथोले २५ हजार पाउने छ। सेमिफाइनलमा पुग्ने टिमले १५/१५ हजार पाउने छन्।

यस्तै महिला र पुरुष दुवैको सर्वोकृष्ट खेलाडीले १० हजार पाउँदा व्यक्तिगत विधातर्फ स्पाइकर, ब्लकर, सेटर, डिफेन्स, सर्भर र प्रशिक्षकले जनही ५/५ हजार पाउने छन्।