टेस्ट वरीयतामा अस्ट्रेलियन खेलाडीको दबदबा

काठमाडौं– इन्टरनेसनल क्रिकेट काउन्सिल (आईसीसी)ले जारी गरेको टेस्ट वरीयतामा अस्ट्रेलियन खेलाडीको दबदबा देखिएको छ।

बुधबार जारी ब्याटिङतर्फको टेस्ट वरीयतामा शीर्ष पाँच खेलाडीमध्ये तीन अस्ट्रेलियन छन्।

वरीयता अनुसार भारतका कप्तान विराट कोहली ९२८ अंकसहित शीर्ष स्थानमा छन्। उनलाई अस्ट्रेलियाका स्टिभन स्मिथले पछ्याइरहेका छन्। उनको ९११ अंक छ। वरीयतामा अस्ट्रेलियाकै मार्नस लाबुसाने तेस्रो स्थानमा छन्। उनले ८२७ अंक पाएका छन्। न्युजिल्यान्डविरुद्धको टेस्ट शृंखलामा उत्कृष्ट प्रदर्शन गरेपछि उनले आफ्नो टेस्ट करियरकै उच्च वरीयता पाएका हुन्।

यस्तै, वरीयतामा न्युजिल्यान्डका केन विलियम्सन चौथो र अस्ट्रेलियाका डेभिड वार्नर पाँचौ स्थानमा छन्। विलियम्सनको ८१४ र वार्नरको ७९३ अंक छ।

बलिङतर्फको टेस्ट वरीयतामा पनि अस्ट्रेलियन खेलाडीकै दबदबा छ। बलिङतर्फ शीर्ष पाँच खेलाडीमध्ये दुई अस्ट्रेलियन छन्।

वरीयता अनुसार अस्ट्रेलियाका प्याट कमिन्स ९०४ अंकसहित पहिलो स्थानमा छन्। दोस्रो, तेस्रो र चौथो स्थानमा क्रमशः न्युजिल्यान्डका नेल वागनर, वेस्ट इन्डिजका जेसन होल्डर र साउथ अफ्रिकाका कागिसो रवाडा छन्। वागनरले ८५२ अंक पाउँदा होल्डरले ८३० र रवाडाले ८२१ अंक बटुलेका छन्। 

पाँचौं स्थानमा भने अस्ट्रेलियाकै मिचेल स्र्टाक छन्। उनको ७९६ अंक छ।

एजेन्सी