सहिद स्मारक ‘ए’ डिभिजन लिग : त्रिभुवन आर्मीलाई शीर्ष स्थानमा उक्लिने मौका

काठमाडौं– कतार एयरवेज सहिद स्मारक ‘ए’ डिभिजन लिगमा आज (बिहीबार) दुई खेल हुँदैछन्।

राजधानीको त्रिपुरेश्वरस्थित दशरथ रंगशालामा दिउँसो १२ बजे हुन लागेको पहिलो खेलमा विभागीय टिम एपीएफ र संकट क्लब आमनेसामने हुँदैछन्।

जारी सिजनमा यी दुवै टिमको प्रदर्शन समान छ। एपीएफले जारी सिजनमा १ जित र १ बराबरी खेल्दा २ खेलमा हार व्यहोरेको छ। संकटाले पनि उस्तै नतिजा निकालेको छ।

एपीएफ ४ अंकसहित अंकतालिकामा १० औं स्थानमा छ भने समान अंक बटुलेको संकटाले ११ औं स्थान हासिल गरेको छ।

लिगको दोस्रो खेलमा अंकतालिकामा चौथो स्थानको त्रिभुवन आर्मीले पुछारमा रहेको सरस्वतीसँग प्रतिस्पर्धा गर्दैछ। यस्तोमा त्रिभुवन आर्मीलाई खेल जितेर शीर्ष स्थानमा उक्लिने मौका छ। यता सरस्वती पनि अंकको खाता खोल्ने दाउमा छ।

जारी सिजनका ४ खेलमध्ये ३ मा जित र १ मा हार व्यहोरेको त्रिभुवन आर्मीको ९ अंक छ। आजको खेलमा जित हासिल गरे आर्मी १२ अंकसहित शीर्ष स्थानमा उक्लिनेछ।

जारी सिजनको अंकतालिकामा मनाङ ११ अंकसहित शीर्ष स्थानमा छ। यस्तै, मछिन्द्र र थ्री स्टार समान १० अंकसहित क्रमशः दोस्रो र तेस्रो स्थानमा छन्।