सीमामा चोरीतस्करी नियन्त्रणमा सशस्त्र सक्रिय

भैरहवा । सीमा क्षेत्रमा हुने चोरी तस्करी नियन्त्रणमा सशस्त्र प्रहरीबल सक्रिय देखिएको छ । सीमा जोडिएको रुपन्देहीको भूगोलमा सशस्त्र प्रहरीले चोरी तस्करी नियन्त्रणमा सक्रियता देखाएको हो ।

सशस्त्र प्रहरी बल २७ नम्बर गण रुपन्देहीका गणपति प्रहरी उपरीक्षक तेज प्रसाद पोख्रेलका अनुसार सीमा अपराध नियन्त्रणमा जिल्लाका चार वटा विओपी, ५ वटा बेस र ३ वटा गुल्ममा रहेका पाँच सय जना सशस्त्र प्रहरीका अधिकृत तथा जवान २४ सै घण्टा तयारी अवस्थामा रहेका छन् । पोखरेलले भने, ‘सीमा अपराध, चोरी पैठारी नियन्त्रणमा हामी अलर्ट अवस्थामा छौं ।’

सशस्त्र प्रहरीले सीमामा हुने अवैध क्रियाकलाप रोक्न सक्रियता देखाएसँगै हप्ता दिनमै लाखौं मूल्यको समान बरामद गरेको छ । मंगलबारमात्रै सशस्त्र प्रहरी बल विओपी पजरकट्टिले ९ लाख ८२ हजार १ सय ५० रुपैयाँ बराबरको कपडा बरामद गरेको छ ।

सशस्त्र प्रहरी बल नेपाल पजरकट्टिका रेशम रोक्काको कमान्डमा खटिएको मोबाइल टोलीले रोहिणी गाउँपालिका वडा नम्बर २ मैनिहवाबाट १० बोरा कपडा बरामद गरेको सशस्त्र प्रहरी निरीक्षक सुशीलबाबु पन्तले बताए ।

यता सशस्त्र प्रहरी बल नेपाल नं. ३८ गुल्म राजस्व भन्सार सुरक्षा गस्तीको टोलीले पनि पिबी ११ ए डब्लु २८९९ नम्बरको भारतीय नम्बर प्लेटको फोर्ड ब्रान्डको कारसहित मोटरपार्टसका सामानहरु बरामद गरी भैरहवा भन्सार कार्यालय वेलहियामा बुझाइएको बताएको छ । राजस्व भन्सार सुरक्षा गस्तीले बरामद गरेको भन्सार मूल्य ११ लाख १३ हजार रहेको छ ।

यसैगरी गुल्म २७ नम्बरबाट खटिएको टोलीले सिद्धार्थनगर नगरपालिका वडा नं. ६ गल्लामण्डी ईलाकामा चेकजाँच गर्ने क्रममा भारतबाट अवैध रुपमा भन्सार छली चोरी पैठारी गरी लु १ च ७१६८ नं. को बलेरो सिंगल पिकअप प्राईभेट गाडीमा नेपाल तर्फ ल्याउँदै गरेको विभिन्न हार्ड वयरका सामानहरु बरामद गरेको छ ।

गाडीका चालक २२ वर्षिय भोला निसाद सहित ९ लाख २४ हजार ६ सय मूल्य बराबरको सामान भन्सार पठाइएको छ । यसैगरी भारतबाट अवैध रुपमा भन्सार छली ल्याउँदै गरेको बुलेट मोटरसाइकलमा प्रयोग हुने २०० लिटर (१० कार्टुन) मोबिल बरामद गरी भन्सार कार्यालय दाखिला गरेको छ ।