भयानक बन्दै अस्ट्रेलियाको आगलागी, ५० करोड जनावर जलेर मरे

काठमाडौं- अस्ट्रेलियामा साढे तीन महिनादेखि फैलिएको विनाशकारी डढेलो झनै भयावह बन्दै गएको छ ।

डढेलो नियन्त्रण गर्न सेना नै परिचालन गरिए पनि अझै नियन्त्रणमा आउन सकेको छैन् । आगो नियन्त्रणमा लिन अझै एक महिना लाग्न सक्ने अस्ट्रेलियाका अधिकारीहरुलाई उधृत गर्दै अन्तर्राष्ट्रिय सञ्चार माध्यमले जनाएका छन् ।

गएको सेप्टेम्बरमा लागेको आगोबाट कम्तीमा २४ जनाले ज्यान गुमाइसकेका छन् भने अझै दर्जनौँ मानिस हराइरहेका छन् ।

अहिलेसम्म ५० करोड भन्दा धेरै जनावर र पशुपंक्षी मरिसकेको अधिकारीहरुले बताएका छन् । उनीहरुका अनुसार झण्डै ५० लाख हेक्टरमा लगाइएको अन्नबाली नष्ट भइसकेको छ । १५ सय भन्दा धेरै घरहरू डढेलोका कारण ध्वस्त भएका छन्।

डढेलोमा परेर मरेका जनावरहरुको तस्बिर सामाजिक सञ्जालमा भाइरल बनिरहेको छ । आगलागीमा फसेका जनावरहरुलाई बचाउन कैयौँ संस्था लागिपरेका छन् । आगलागीका कारण अहिलेसम्म अस्ट्रेलियाको १५ मिलियन एकड क्षेत्रफल जङ्गल खरानी भइसकेको छ ।

दक्षिण–पूर्वी अस्ट्रेलियाका विभिन्न भागमा तापक्रम ४० डिग्री सेल्सियसभन्दा माथि पुगेको छ। तापक्रम बढ्दै गएको, हावा लागेको र आगोका ठूला मुस्लाहरु धेरै क्षेत्रमा फैलिएका कारण आगो नियन्त्रणमा लिन कठिनाइ भएको जनाइएको छ।

प्रधानमन्त्री स्कट मरिसनले देशभरि डढेलो नियन्त्रणमा सघाउनका लागि तीन हजार रिजर्भ फौज परिचालन गरिएको बताएका छन् । रक्षामन्त्री लिन्डा रेनोल्ड्सका अनुसार अस्ट्रेलियाको इतिहासमा यस्तो गरिएको यो पहिलो पटक हो।

अस्ट्रेलिया सरकारले न्यु साउथ वेल्स र भिक्टोरिया प्रान्तको जङ्गलमा लागेको आगोलाई लिएर आपतकालीन स्थिति घोषणा गरेको छ । यो सिजनमा यो तेस्रो पटक आपतकालीन घोषणा हो । सडक बन्द गरिएको छ भने स्थानीय र पर्यटकलाई त्यहाँबाट अन्यत्रै पठाइएको छ ।

तस्बिर– विभिन्न अन्तर्राष्ट्रिय सञ्चारमाध्यमबाट