हेलिकप्टर दुर्घटनामा ताइवानका सेना प्रमुख सहित ८ सैन्य अधिकारीकोे मृत्यु

ताइवानका सेना प्रमुख शेन यि मिङको राजधानी ताइपेइ नजिक भएको हेलिकप्टर दुर्घटनामा निधन भएको छ । उनीसँगै हेलिकप्टरमा सवार अन्य सैन्य अधिकारीहरु पनि मारिएका छन्।

ताइवानको रक्षा मन्त्रालयका अनुसार हेलिकप्टरमा १३ जना सवार थिए। त्यहाँको सरकारी समाचार एजेन्सीले कम्तिमा ८ जनाको दुर्घटनामा परी निधन भएको पुष्टि गरेको छ।

ताइपेइ नजिकको पहाडमा हेलिकप्टर आकस्मिक अवतरण गर्दा दुर्घटना हुन पुगेको हो।

दुर्घटनाको कारण भने अझै पत्ता लागिसकेको छैन । ताइवानको वायु सेना प्रमुख हिसुङ होउ चीले पत्रकार सम्मेलनमा घटनाको जानकारी दिंदै भने, “उद्दार कार्य जारी छ । दुर्घटनाको कारण मौषम वा यान्त्रिक के हो भन्ने हामी अनुसन्धान गरिरहेका छौं।

ताइवानी रक्षा मन्त्रालयका प्रवक्ताले दुर्घटनाग्रस्त हेलिकप्टर यूएच– ६० ब्ल्याक हक रहेको र त्यसमा सवारमध्ये पाँच जना जिवितै रहेको जानकारी दिएका छन्।

६२ वर्षीय शेन र अन्य शीर्ष सैन्य अधिकारीहरु नयाँ वर्षका अवसरमा नियमित सैनिक मिसनमा यिलान काउन्टी जाँदै गर्दा उनीहरु सवार हेलिकप्टर दुर्घटना भएको हो।

हेलिकप्टर दुर्घटनामा परेर ताइवानका प्रधानसेनापति बेपत्ता