आउँदो हप्तादेखि सुर्खेतमा विद्यालय खुल्ने

सुर्खेत– आउँदो हप्तादेखि सुर्खेतका निजी तथा सामुदायिक विद्यालय खुल्ने भएको छन् । शुक्रबार बसेको कोरोना संकट व्यवस्थापन समितिले आउँदो हप्तादेखि जिल्लाका सबै विद्यालय खोल्ने निर्णय गरेको हो । 

‘आउँदो हप्तादेखि सुर्खेतका सबै विद्यालयहरु खोल्ने निर्णय भएको छ,’ सुर्खेतका प्रमुख जिल्ला अधिकारी छविलाल रिजालले भने, ‘कोरोनामा जोखिम नरहेका क्षेत्रमा २२ गतेदेखि र अन्य ठाउँमा २६ गतेसम्म विद्यालयहरु खुल्छन् ।’

कोरोना संक्रमण नभएका र कम जोखिम रहेका विद्यालयहरु आइतबारदेखि नै खोल्न सक्ने सकिने छ । ‘सुर्खेतका तीनवटा नगरपालिका (वीरेन्द्रनगर, भेरीगंगार र गुर्भाकोट)मा शिक्षा विकास तथा समन्वय इकाईको निर्देशन अनुसार विद्यालय खोल्छन्’ उनले भने, ‘तर २६ गतेभित्र जिल्लाका सबै विद्यालयहरु खुल्छन् ।’

विद्यालय खोल्दा तोकिएका सुरक्षा मापदण्डहरु अनिवार्य रुपमा पालन गर्नुपर्ने छ । विद्यालयहरु खोल्दा विद्यार्थी संख्याको आधारमा दुई सिफ्ट (जोर बारको दिन चोर कक्षा र विजोरबारका दिन विजोर कक्षा) सञ्चालन गर्नुपर्ने छ । तर विद्यार्थी संख्या कम भएका र कोरोनाको जोखिन नभएका पालिकाहरुमा भने यो नियम लागु हुने छैन ।

त्यस्तै विद्यालय सुरक्षा मापदण्ड पालन गरे–नगरेको अनुगमनका लागि सम्बन्धि पालिकाको शिक्षा शाखाले विशेष समितिसमेत बनाउनुपर्ने छ । समितिमा पालिकाको शिक्षा शाखा, शिक्षक महासंघ, प्याव्सन, एनप्याव्सनका प्रतिनिधिहरुको सहभागिता रहने छ ।