‘ए’ डिभिजन लिग : तेस्रो चरण सकिँदा मनाङ शीर्ष स्थानमा, थ्री स्टार दोस्रो

काठमाडौं– कतार एयरवेज सहिद स्मारक ‘ए’ डिभिजन लिगमा तेस्रो चरणका खेल सकिँदा मनाङ मर्स्याङदी क्लब शीर्ष स्थानमा छ।

मनाङलाई थ्री स्टार क्लबले पछ्याइरहेको छ। अंकतालिका अनुसार मनाङले ३ खेलबाट शत प्रतिशत जित निकाल्दै ९ अंक बटुलेको छ भने समान खेल खेलेको थ्री स्टारकाे ७ अंक छ।

जारी प्रतियोगितामा मनाङ र थ्री स्टार अपराजित छन्। मनाङले विभागीय क्लब एपीएफ र त्रिभुवन आर्मीसँगै ब्रिगेड ब्वाइज क्लबलाई पराजित गरेको हो भने थ्री स्टारले विभागीय क्लब नेपाल पुलिस र एपीएफलाई पराजित र जाउलाखेल युथ क्लबसँग बराबरी खेलेको हो।

मनाङ र थ्री स्टारसँगै मछिन्द्र क्लब र जाउलाखेल युथ क्लबले पनि खेल हारेका छैनन्। 

प्रतियोगिताको अंकतालिकामा मछिन्द्र तेस्रो, त्रिभुवन आर्मी चौथो र जाउलाखेल पाँचौं स्थानमा छन्। यस्तै, न्युरोड टिम (एनआरटी)ले छैटौं, नेपाल पुलिसले सातौं, च्यासल युथ क्लबले आठौं, संकटा क्लबले नवौं, ब्रिगेड ब्वाइज क्लबले दसौं, हिमालयन शेर्पा क्लबले एघारौं, एपीएफले बाह्रौं, फ्रेन्डस क्लबले तेह्रौं स्थान ओगट्दा सरस्वती युथ क्लब पुछारमा रहेको छ।

तेस्रो चरणसम्म फ्रेन्ड्स र सरस्वती क्लबले तीनै खेल हारेका छन्। सरस्वतीले अहिलेसम्म गोल गरेको छ।

प्रतियोगितामा सर्वाधिक गोलकर्तामा सन्तोष साहुखल अग्रस्थानमा छन्। उनले अहिलेसम्म ३ गोल गरेका छन्। उनलाई सरोज तामाङ, विमल राना, ड्याड्डी जुनिएर वाम्बा, जुनिएर निकेनगुएले पछ्याइरहेका छन्। उनीहरूले २–२ गोल गरेका छन्।