मनाङको तापक्रम : दिनमा माइनस १०, रातमा माइनस २० डिग्री

मनाङ- चिसो बढेसँगै मनाङको तापक्रम दिनमा माइनस दश, रातमा माइनस २० डिग्रीमा झरेको छ ।

चिसोका कारण मनाङवासी जिल्ला बाहिर जानेक्रम जारी रहेको छ । पर्यटक, कर्मचारी र जिल्लाभित्र रहेका स्थानीयवासी घरभित्र नै बस्न बाध्य भएका छन् ।

जिल्ला प्रहरी कार्यलयका प्रहरी नायब निरीक्षक श्रवणकुमार विकले मनाङको तापक्रम माइनस १० पुगेकोे र बेलुकी माइनस १६ देखि २० डिग्रीसम्म पुग्ने गरेको जानकारी दिए । 

रातकाे समयमा बस्नै नसक्ने अवस्था बन्ने गरेकाे उनले सुनाए । उनका अनुसार खानेपानीको मुहान जमेर धारोमा पानी आएको छैन । खाेला र तालकाे पानी समेत जमेकाे छ । 

अत्याधिक चिसाे भएपछि मानिस घर बाहिरसमेत निस्किन नसकेकाे  प्रहरी नायब निरीक्षक विकले बताए । माथिल्लो भेगमा रहेका मानिस जिल्ला बाहिर झरिसकेका छन् ।

थोराङला बेसक्याम्पदेखि मथिल्लो मनाङ सुनसानजस्तै भएको छ । पर्यटक आउने जाने क्रम जारी भए पनि होटल व्यवसायी भने होटलमा कुरुवा राखेर जिल्ला बाहिर पुगिसकेका छन् ।

प्रमुख जिल्ला अधिकारी पुष्परा ढकालले चिसो बढेपछि जिल्ला सुनसानजस्तो भएको बताउनुभयो तल्लो भेगमा समेत अधिकांश मानिस जिल्ला छोडी सकेका छन् ।