पिपिएल क्रिकेटमा काठमाडौंको दोस्रो जित

पोखरा- पोखरा प्रिमियर लिग पिपिएल क्रिकेटमा काठमाडौं गोल्डेन वारियर्सले दोस्रो जित निकालेको छ।

शनिबार पोखरा रंगशालामा भएको खेलमा विराटनगर टाईटन्सलाई ३६ रनले पराजित गर्दै काठमाडौंले दोस्रो जित निकालेको हो।

काठमाडौंले दिएको १ सय ६० रनको लक्ष्य पछ्याएको विराटनगर १९ ओभर ४ बलमा अलआउट हुँदै १ सय २३ रनमा समेटियो।

विराटनगरका पुनित मेहेराले ५३ रनको अर्धशतकीय इनिङ्स खेले पनि टोलीलाई जित दिलाउन सकेनन्।

यस्तै कप्तान प्रदिपले २९ रन जोड्दा नोमन खानले २५ रन बनाए।

काठमाडौंका सुबोध भाटीले ३ तथा बसन्त रेग्मी र अमर सिंह रौटेलाले २-२ विकेट लिए।

टस जितेर पहिले ब्याटिङ गरेको काठमाडौंले २० ओभरमा ५ विकेट गुमाएर १ सय ५९ रन बनाएको थियो।

काठमाडौंका लागि जयक्रिशन कोल्शावालाले ५५ रनको अर्धशतकीय इनिङ्स खेले।

कप्तान ज्ञानेन्द्र मल्लले ४५ रन तथा अमित श्रेष्ठले १७ रन बनाए।

विराटनगरका लागि पुनित मेहेराले २ विकेट लिए।

जितसँगै काठमाडौंले ४ खेलमा ४ अंक जोडेको छ। काठमाडौं दोस्रो स्थानमा उक्लिएको छ।