भारतमा जारी प्रदर्शनमा शुक्रबार ५ जनाको मृत्यु

काठमाडौं- भारतमा नागरिकता संशोधन सम्बन्धी कानूनको विरोधमा देशभर जारी प्रदर्शन हिंसामा परिणत भएको छ।

राजधानी नयाँ दिल्ली, बिहार, उत्तर प्रदेश लगायतका ठाउँमा शुक्रबार पनि दिनभरजसो प्रदर्शन जारी रहेको छ। धेरै स्थानमा प्रहरीसँग झडप भएको छ।

शुक्रबार मात्रै उत्तर प्रदेशमा भड्किएको हिंसामा ५ जनाको मृत्यु भएको छ। प्रहरीसँग भएको झडपमा पाँचजना प्रदर्शनकारी मारिएका हुन्।

प्रहरीले भने घटनामा दुईजनाको मात्र मृत्यु भएको दाबी गरेको छ।

भारतले हालै बनाएको नागरिकता सम्बन्धी कानूनमा मुस्लिम समुदायका व्यक्तिलाई नागरिकतामा विभेद गरिएको भन्दै देशभर आन्दोलन भइरहको छ।

आन्दोलनमा उत्रिएका विद्यार्थी, मुस्लिम समुदायका व्यक्तिहरु, त्यहाँका सबैजसो विपक्षी दल एवम नागरिक समाज र साहित्यकारहरु लगातार गिरफ्तार भइरहेका छन्।

भारतीय गृहमन्त्रालयले भने नगारिकता कानुनमा कसैलाई पनि विभेद नगरिएको दाबी गर्दै शान्त हुन आग्रह गरेको छ।

यसअघि बिहीबार भएको प्रदर्शनमा २ जनाको मृत्यु भएको थियो भने त्यसअघिका झडपमा कम्तीमा ६ जनाको मृत्यु भएको थियो।