पारस र मुस्तफाको अर्धशतकीय प्रदर्शनमा चितवनको लगातार दोस्रो जित

काठमाडौं - पोखरामा जारी पोखरा प्रिमियर लिग (पीपीएल) क्रिकेटमा चितवन राइनोजले रोहन मुस्तफा र कप्तान पारस खड्काको उत्कृष्ट ब्याटिङमा लगातार दोस्रो जित निकालेको छ।

बिहिबार सम्पन्न खेलमा चितवनले बुटवल ब्लास्टर्सलाई १ सय १९ रनको फराकिलो अन्तरले पराजित गर्‍यो। चितवनले दिएको २ सय ४ रनको विजयी लक्ष्य पछ्याएको बुटवल
१८ ओभर ४ बलमा ८४ रनमा समेटियो।

बुटवलका शिवम सिंहले सर्वाधिक ३३, भिम सार्कीले २१ र हरि चौहानले १२ रन बनाउन वाहेक अन्यले दोहोरो अंकसमेत जोड्न सकेनन्। बुटवललाई सस्तैमा समेट्न करण केसीले ४ तथा रोहन मुस्तफाले २ विकेट लिए।

त्यसअघि टस हारेर पहिले ब्याटिङ गरेको चितवनले निर्धारित २० ओभरमा ३ विकेट गुमाउँदै २ सय ३ रन जोडेको थियो। चितवनका लागि पारस र मुस्तफाले अर्धशतकीय पारी खेले। पहिलो विकेटका लागि दुबैले १ सय १७ रनको साझेदारी गरे। पारस ६३ रनमा आउट हुँदा मुस्तफा भने ७० रनमा अविजित रहे। यस्तै आरिफ सेखले विस्फोटक ब्याटिङ गर्दै १९ बलमा ४० रन जोडे। बुटवलका अफ्ताबउद्दिन अहमदले २ विकेट लिए। चितवनले बनाएको यो योगफल पीपीएल क्रिकेटकै सर्वाधिक ठुलो रनसमेत हो।

जितसँगै चितवनले २ खेलमा सतप्रतिशत जित निकाल्दै ४ अंक शिर्ष स्थानमा रहेको छ। पहिलो खेलमा चितवनले पोखरा पल्टनलाई पराजित गरेको थियो।