असमको तनावले जापानी प्रधानमन्त्रीको भारत भ्रमण रद्ध

काठमाडौं- जापानी प्रधानमन्त्री सिन्जो आबेले भारत भ्रमण रद्ध गरेका छन्।

भारतमा नागरिकता संशोधन सम्बन्धी विधेयकको देशभर भइरहेको विरोधका कारण जापानी प्रधानमन्त्री आबेले भारत भ्रमण रद्ध गरेका हुन्।

नागरिकता संशोधन विधेयकका कारण भारतको उत्तर पूर्व राज्यहरुमा केही दिनदेखि हिंसात्मक प्रदर्शनहरु भइरहेका छन्। प्रदर्शनका कारण असममा २ जनाको मृत्यु भएको छ।

गुवाहाटीमा केही दिनदेखि कफ्र्यु जारी छ भने १० वटा जिल्लामा इन्टरनेट सेवा बन्द गरिएको छ।

निर्धारित समयअनुसार जापानी प्रधानमन्त्री आबे भारतीय समकक्षी नरेन्द्र मोदीको निमन्त्रणमा शुक्रबार भारत भ्रमण गर्ने कार्यक्रम थियो।

भारतीय विदेश मन्त्रालयका प्रवक्ता रवीश कुमारले अब आबेको भ्रमण दुबै देशको सहमतिमा अर्को मितिमा तय गरिने बताएका छन्।

उनको भारत भ्रमणमा दुई देशबीच सहयोग आदान प्रदान एवम् असममा यसै वर्ष जापानले निर्माण सुरु गरेका केही भौतिक संरचनाहरुको अनुगमनको कार्यतालिका थियो। दुबै प्रधानमन्त्री असम जाने कार्यक्रम रहेको थियो।