२५० पत्रकार जेलमा, २४ मारिए, ६४ बेपत्ता

काठमाडौं-  यस वर्ष विश्वभर कम्तिमा २५० पत्रकार जेलमा परेका, २४ पत्रकार मारिएका र ६४ पत्रकार हराइरहेका छन्।

पत्रकारहरुको सुरक्षाका लागि काम गरिरहेको अन्तर्राष्ट्रिय संस्था कमिटी टू प्रोटेक्ट जर्नलिस्ट (सीपीजे) को हालै सार्वजनिक प्रतिवेदनका अनुसार विश्वभर कैयौं पत्रकारले समाचार लेखेकै कारण ‘राजद्रोह’ को सामना गर्नु परेको छ।

सीपीजेको रिपोर्टका अनुसार अत्यधिक समाचार सेन्सर हुने र पत्रकार असुरक्षित रहेका प्रमुख १० देशहरुमा टर्की, साउदी अरब, इजिप्ट, इरिट्रिया, भियतनाम, इरान, चीन, उत्तर कोरिया, इरान, क्युबा, बेलारुस र इक्वाटेरियल गिनिया छन्।

प्रतिवेदनले चीनमा सबै भन्दा धेरै ४८ जना पत्रकार जेलमा रहेको उल्लेख गरेको छ । त्यस्तै टर्कीमा ४७ जना पत्रकार जेलमा छन् । गत वर्ष टर्कीमा ६८ जना पत्रकार जेलमा थिए।

टर्की सरकारले १०० भन्दा धेरै समाचार आउटलेट बन्द गराएको छ भने कैयौं पत्रकारहरुले आतंकवाद सम्बन्धी मुद्दा खेप्नु परेको छ।
साउदी अरबको जेलमा रहेका १८ जना पत्रकारविरुद्ध कुनै आरोप खुलाइएको छैन।

सीपीजेले कुनै पनि पत्रकार समाचार लेखेकै आधारमा जेलमा बन्द हुने अवस्थाको भर्त्सना गरेको छ।