जनकपुरधाम- नेकपा (एमाले)बाट अलग्गिएर बनेको नेकपा (एकीकृत समाजवादी) पार्टीका पक्षमा १० जना प्रदेशसभा सदस्यले सनाखत गराएका छन्। जनकपुरधामस्थित निर्वाचन आयोगको प्रादेशिक कार्यालय पुगेर एमालेका १० जना प्रदेश २ का प्रदेशसभा सदस्यले एकीकृत समाजवादीका पक्षमा सनाखत गराएका हुन्।
बिहीबार १० जना प्रदेशसभा सदस्य सशरीर उपस्थित भएर सनाखत गराएका हुन् भने एक जना अस्वस्थ भएकाले निवर्गाचन आयोगमा निवेदन पठाएर पत्र मार्फत सनाखत गराउने बताइएको छ ।
सनाखत गराउने प्रदेशसभा सदस्यहरुमा मदनसेन श्रीवास्तव, नागेन्द्र यादव, गोविन्द न्यौपाने, शत्रुधन महतो, रबिन्द्र बैठा, मञ्जु यादव, हसिमा खातुन, बेची लुंगेली, अशोक यादव र प्रमोद यादवले सनाखत गराएका हुन् ।
प्रदेशसभा सदस्य डिल्ली उप्रेती क्यान्सर पीडित रहेको र स्वास्थोपचारको क्रममा नयाँ दिल्लीमा रहेको र उताबाट उनको निवेदन आए लगत्तै सनाखत गराइने नेकपा एकिकृत समाजवादी पार्टीका नेता शत्रुधन महतोले जानकारी दिए ।
त्यस्तै सुन्दर बहादुर विश्वकर्मा र सीता गुरुंगले आइतबार सनाखत गराउने उनले बताए ।