महाराष्ट्रको मुख्यमन्त्रीमा उद्धव ठाकरेले प्राप्त गरे बहुमत

एजेन्सी- भारतको महाराष्ट्र राज्यको मुख्यमन्त्री बनेका शिव सेनाका उद्धव ठाकरेले बहुमत प्राप्त गरेका छन्।

शनिबार बसेको विधानसभा बैठकमा उद्धवलाई बहुमत प्राप्त भएको हो। विधानसभा बैठक भारतीय जनता पार्टीका सांसदहरुले बहिस्कार गरेका छन्।

भाजपाका सांसदहरु बाहिरिएपछि सांसदहरुको संख्या गणना गरी उद्धव ठाकरेले बहुमत प्राप्त गरेको घोषणा गरिएको हो।

सदनमा विश्वासको मत प्राप्तिको प्रक्रियाका क्रममा भाजपाका विधानसभा सदस्यहरु विरोध गर्दै बाहिरिएका थिए।

भाजपा सांसदहरु बाहिरिएपछि विधानसभा बैठक कक्षको ढोका बन्द गरेर सांसदहरुको गणना गरिएको थियो।

पूर्व मुख्यमन्त्रीसमेत रहेका भाजपा संसदीय दलका नेता देवेन्द्र फडणवीसले विधानसभामा अनियमितता भएको र यसबारे राज्यपाललाई उजुरी गर्ने प्रतिक्रिया दिएका छन्।

ठाकरेले नेशनल कांग्रेस र कांग्रेस आईसँग मिलेर सरकार गठन गरेका हुन्।

यसअघि भाजपा नेता फडणवीसले नेशनल कांग्रेसका केही नेताहरुलाई लिएर सरकार गठन गरे पनि विश्वासको मत प्राप्त गर्न नसकेपछि राजीनामा दिएका थिए।