चार स्रष्टालाई म्युजिक नेपाल सम्मान

काठमाडौं- म्युजिक नेपालले आफ्नो ३६ औँ वार्षिकोत्सवको अवसरमा नेपाली आधुनिक गीत–सङ्गीत क्षेत्रमा लामो समयदेखि उल्लेखनीय योगदान पुर्याउने विशिष्ट चारजना साधकहरूलाई ‘म्युजिक नेपाल–सम्मान २०७६’ बाट सम्मानित गरेको छ।

६ दशक लामो समयदेखि निरन्तर आफ्ना कालजयी गीत रचनाका माध्यमबाट नेपाली संगीत क्षेत्रमा योगदान पुर्याउँदै आएका गीतकारद्वय किरण खरेल र रत्नशमशेर थापा तथा साढे चार दशकभन्दा अघिदेखि नेपाली सुगम सङ्गीतमा साधनारत सङ्गीतकारद्वय दीपक जङ्गम र शम्भूजीत बासकोटालाई ‘म्युजिक नेपाल–सम्मान– २०७६’ बाट सम्मानित गरिएको हो।

सम्मान स्वरूप प्रति स्रष्टालाई नगद ५० हजार र ट्रफीसहित वाङ्मय शताब्दीपुरुष सत्यमोहन जोशी, कवि–गीतकार एवम् नारायण गोपाल सङ्गीत कोषकी अध्यक्ष उषा शेरचन तथा म्युजिक नेपालका संस्थापक, अध्यक्ष सन्तोष शर्माले संयुक्त रूपमा सम्मान प्रदान गरेका थिए।