नेपाल भारत सीमा सुरक्षा बैठक बस्दै, कालापानीको विषयमा छलफल नहुने

काठमाडाैं- नेपाल भारत सीमा सुरक्षा बैठक बस्दै, कालापानीको विषयमा छलफल नहुने

कात्तिक– नेपाल-भारत सीमा विवाद चर्किदै गएका बेला सीमा सुरक्षा बैठक पोखरामा बस्दैछ । तर, बैठकमा भारतबाट अतिक्रमणमा परेको भूमिका विषयमा छलफल नहुने भएको छ ।

तीन वर्षपछि मंसिर ४ गतेदेखि ६ गतेसम्म बस्न लागेको बैठकमा सीमा क्षेत्रमा हुने अपराध, अवैध ओसारपसार नियन्त्रण, संयुक्त सुरक्षा गस्तीलगायतका विषयमा छलफल हुने भएको छ। भारतले सीमा अतिक्रमण गरेको विषय भने छलफलको एजेन्डा बनाइएको छैन् ।

पछिल्लो समय लिम्पियाधुरदेखि लिपुलेकसम्मको क्षेत्रलाई समेटेर भारतले जारी गरेको नयाँ नक्साका विषयमा बैठकमा छलफल नहुने भएको छ । सीमा सुरक्षाको विषयमा मात्रै छलफल हुने भएकाले यो बैठकमा कालापानी क्षेत्र भारतले हडपेको विषयमा छलफल गर्ने कुनै तयारी नभएको गृह मन्त्रालय स्रोतले जनाएको छ ।

नेपालको लिपुलेक, कालापानीलगायतका भूभागलाई समेटेर भारतले राजनीतिक नक्सा सार्वजनिक गरेसँगै त्यसको नेपालमा चर्को विरोध हुँदै आएको छ। नेपाल सरकारले पनि भारतीय नयाँ नक्सा स्विकार्न नसकिने बताएको छ । तर, भारतले भने नयाँ नक्सामा आफ्नो भूमि मात्रै समेटिएको दाबी गर्दै आएको छ ।

सीमा सुरक्षा बैठकमा नेपालको सशस्त्र प्रहरी बल र भारतको सीमा सुरक्षा बल (एसएसबी)का प्रमुखसहितका अधिकारीहरु सहभागी हुनेछन् । सशस्त्र प्रहरी प्रमुख शैलेन्द्र खनालले बैठकमा पेस गर्ने एजेण्डा तयार पारेर गृह मन्त्रालयमा पेस गरेका छन् । सो प्रस्ताव गृहले परराष्ट्र मन्त्रालयमा बुझाएको छ ।

हरेक वर्ष आयोजना हुनुपर्ने नेपाल–भारत सीमा सुरक्षा बैठक नियमित हुन सकेको छैन । २०६९ सालयता जम्मा तीनपटक सीमा सुरक्षा बैठक बसेको छ ।