सल्यानमा जीप दुर्घटना, दुईको मृत्यु

सुर्खेत - सल्यानमा बिहीबार भएको जीप दुर्घटनामा दुई जनाको मृत्यु भएको छ । त्रिवेणी गाउँपालिकाको फलावाङ्गबाट दाङको तुलसीपुरतर्फ जाँदै गरेको रा १ झ ४३२ नम्वरको जीप दुर्घटना हुँदा त्रिवेणी गाउँपालिका ४ फलावाङ्गका ६० वर्षीया कृष्णदेवी परियार र सोही ठाँउका ५९ वर्षीया यज्ञी थापाको मृत्यु भएको जिल्ला प्रहरी कार्यालय सल्यानले जनाएको छ ।

सल्यानका प्रहरी प्रमुख डिएसपी ढकेन्द्र खतिवडाका अनुसार दुबै जनाको उपचारका क्रममा राप्ती प्रादेशिक अस्पताल तुलसीपुरमा मृत्यु भएको हो ।

त्यस्तै दुर्घटनामा आठ जना घाइते भएका छन्। घाइते हुनेमा जीप चालक फलावाङ्गका २८ वर्षीय सन्दिप परियार, २३ वर्षीया रीता रावत, ८ वर्षीया ज्योती रावत, २३ वर्षीया मोति रावत, ५५ वर्षीया सावित्रा खत्री, २२ वर्षीया तारा थापा, २१ वर्षीया राधा बोहरा र दाङ तुलसीपुर उप-महानगरपालिकाकी २८ वर्षीया दिला बुढा रहेका सल्यान प्रहरीले जनाएको छ। घाइते सबैको राप्ती प्रादेशिक अस्पतालमा उपचार भइरहेको छ।