यूएईबाट तीन पदक जितेर फर्कियो नेपाली बक्सिङ टोली

काठमाडौं– एएसबीसी युथ तथा जुनियर बक्सिङ प्रतियोगितामा सहभागी भएको तीन खेलाडीसहित ४ सदस्यीय नेपाली बक्सिङ टोली मंगलबार स्वदेश फर्किएको छ।

६ खेलाडीले प्रतिस्पर्धा गरेकोमा मंगलबार स्वदेश फर्किने तीनै खेलाडी पदक विजेता थिए। ती सबै खेलाडीले काश्य पदक जितेका थिए। उनीहरू सबैले सेमिफाइनलमा हार बेहोरे।

नेपाल फर्किएको टोलीलाई नेपाल बक्सिङ संघका अध्यक्ष राम अवाले, मुख्य प्रशिक्षक प्रकाश थापा मगरलगायतले त्रिभुवन अन्तर्राष्ट्रिय विमानस्थलमा स्वागत गरे।

अगष्ट २० देखि ३१ तारिखसम्म दुबईमा भएको प्रतियोगितामा ६ खेलाडीसहित ११ सदस्यीय टोलीले भाग लिएका थिए। ३ खेलाडीसहित ७ सदस्यीय टोली भने यसअघि नै फर्किसकेको नेपाल बक्सिङ संघले जनाएको छ।

पुरुष जुनियर ५४ केजीमा छिरिङ वाङदी शेर्पाले काश्य जिते । क्वार्टरफाइनलमा कुवेतका खेलाडीलाई ५–० ले पराजित गर्दै छिरिङले सेमिफाइनलमा स्थान बनाएका थिए। सेमिफाइनलमा छिरिङ ताजकिस्तानका खेलाडीसँग चुके। पछि यो स्पर्धामा ताजकिस्तानका खेलाडीले स्वर्ण नै जिते। छिरिङको यो दोश्रो अन्तर्राष्ट्रिय प्रतियोगिता हो ।

विमानस्थलमा भएको स्वागत कार्यक्रममा छिरिङले प्रतियोगिताका लागि धेरै मेहनत गर्नुका साथै ट्रेनिङमा बक्सिङ संघ र गुरुहरुले पनि धेरै सहयोग गरेका कारण सफलता प्राप्त भएको बताए। छिरिङले सफलताले आगामी दिनमा अझ बढी राम्रो गर्न हौसला बढेको बताउँदै अबको लक्ष्य युथ च्याम्पियनसिप रहेको बताए।

महिलातर्फ जुनियर ५२ केजीमा स्वस्तिका तिरुवा तथा युथ ५७ केजीमा नारिका राईले काश्य हात पारे। पहिलो चरणमा बाइ पाउँदै सेमिफाइनलमा पुगेपछि दुवैको कम्तीमा काश्य पदक सुनिश्चित भएको थियो।

सेमिफाइनलमा दुवै भारतीय खेलाडीबाट पराजित भए। काश्य विजेता खेलाडीत्रयले १ हजार अमेरिकी डलर नगद पुरस्कार जितेका छन्। बाँकी तीन खेलाडी सुलभ माली, इन्द्रबहादुर सुनार र सुदेन गिरी पहिलो चरणबाटै बाहिरिएको पदक विजेता खेलाडीसँगै स्वदेश फर्किएका प्रशिक्षक दीपक महर्जनले जानकारी गराए।