'हाई प्रोफाइल जुवाडे' थप २० दिन थुनामै रहने

काठमाडौं– कार्तिक १० गते महाराजगञ्जको एक जुवा खालबाट पक्राउ परेका २५ जना 'हाई प्रोफाइल जुवाडे' थप २० दिन प्रहरी हिरासतमा बस्ने भएका छन्।

सम्पत्ति शुद्धीकरण अनुसन्धान विभागले उनीहरुमाथि अनुसन्धानका लागि अदालतबाट २० दिन थुनामा राख्ने म्याद लिएको छ।

उनीहरुलाई महानगरीय वृत्त महाराजगञ्जको टोलीले मंगलबार विभागमा बुझाएको थियो।

जिल्ला प्रशासन कार्यालयले दुई करोड ६७ लाख रुपैयाँसहित पक्राउ परेका २५ जुवाडेलाई सोमबार धरौटीमा रिहा गर्न आदेश दिएको थियो । उनीहरुसँग पहिलो पटक पक्राउ परेकाको हकमा ३० हजार र पटकेका हकमा ५० हजार धरौटी माग गरिएको थियो।

तर, सम्पत्ति शुद्धीकरण अनुसन्धान विभागले ती २५ जुवाडेलाई हाजिर गराउन पत्र लेखेपछि उनीहरूलाई प्रहरीले विभागमा बुझाएको हो।

गएको कात्तिक १० गते  महाराजगञ्ज पिपलमार्गस्थित बिक्रम गौतमको घरबाट ती २५ जुवाडे पक्राउ परेका थिए। 

जुवाखालबाट २ करोड ६७ लाख रुपैयाँसहित क्यासिनो किङका रुपमा चिनिने बलराम सापकोटा, सुमन अग्रवाल, पवन अग्रवाल, सोभित सिलवाल, प्रदीप बोगटी, रामकृष्ण केसी, इन्दु श्रेष्ठ, सीताराम खड्का, रोशन तामाङ पक्राउ परेका थिए ।

यस्तै राम तामाङ, कृष्ण भण्डारी, सुमन गुरुङ, रञ्जन राजवंशी, सोदेल कार्की, पवित्रकुमार कार्की, मुक्ति लामा, भक्त तामाङ, शम्भु बुढाथोकी, अशोक श्रेष्ठ, प्रेम थापामगर, हलामप्रसाद पराजुली, बुद्ध लामा, थम्कु शेर्पा र नवाङ लामा पनि पक्राउ परेका थिए ।