अझै छुटेनन् 'हाइप्रोफाइल' जुवाडे, सम्पत्ति शुद्धीकरणले अनुसन्धान गर्दै

काठमाडौं- २ करोड ६७ लाख रुपैयाँ सहित जुवाको खालबाट पक्राउ परेका २५ जुवाडेमाथि सम्पत्ति शुद्धीकरण विभाले पनि अनुसन्धान थालेपछि उनीहरुको हिरासत अझै लम्बिने भएको छ ।

उनीहरुलाई थप अनुसन्धानका लागि विभागमा बुझाउन लागिएको महानगरीय प्रहरी प्रमुख एसएसपी उत्तमराज सुवेदीले नेपाल समयलाई जानकारी दिए ।

जुवा खेलेको अभियोगमा दायर भएको मुद्दामा जिल्ला प्रशासन कार्यालयले सोमबार उनीहरुलाई धरौटीमा रिहा गरेको थियो । तर,रिहा हुनासाथ उनीहरुको सम्पत्ति छानविनका लागि भन्दै प्रहरीले सोमबार नै पुनः पक्राउ गरेको हो ।

गएको कात्तिक १० गते महाराजगञ्जमा जुवाखालबाट २ करोड ६७ लाख रुपैयाँसहित क्यासिनो किङका रुपमा चिनिने बलराम सापकोटासहित सुमन अग्रवाल, पवन अग्रवाल, सोभित सिलवाल, प्रदीप बोगटी, रामकृष्ण केसी, इन्दु श्रेष्ठ, सीताराम खड्का, रोशन तामाङ पक्राउ परेका थिए ।

यस्तै राम तामाङ, कृष्ण भण्डारी, सुमन गुरुङ, रञ्जन राजवंशी, सोदेल कार्की, पवित्रकुमार कार्की, मुक्ति लामा, भक्त तामाङ, शम्भु बुढाथोकी, अशोक श्रेष्ठ, प्रेम थापामगर, हलामप्रसाद पराजुली, बुद्ध लामा, थम्कु शेर्पा र नवाङ लामा पनि पक्राउ परेका थिए ।