प्रचण्ड भन्छन्- 'दाङ बन्छ प्रदेश ५ को राजधानी'

दाङ- नेकपाका अध्यक्ष तथा पूर्वप्रधानमन्त्री पुष्पकमल दाहाल प्रचण्डले दाङलाई प्रदेश नम्बर ५ को राजधानी बनाउन सुझाव दिएका छन् ।

बुधबार दाङमा आयोजित एक कार्यक्रममा मुख्यमन्त्री शंखर पोखरेललाई साक्षी राख्दै प्रचण्डले प्रदेश ५ को राजधानी दाङलाई नै बनाउनु पर्नेमा जोड दिएका हुन् । उनले भने- 'सबैका लागि पायक पर्ने र सेन्टर क्षेत्र दाङ नै हुन्छ । त्यसकारण यसलाई प्रदेश ५ राजधानी बनाउनु पर्छ ।'

हाल रहेको अस्थायी राजधानी बुटलब बाँकेलगायतका क्षेत्रका नागरिकका लागि अपायक रहेको उनको टिप्पणी छ । 'प्रदेश ५ का जनताको मनोभाव पनि दाङ नै राजधानी बनोस भन्ने छ । त्यसैलाई राजधानी बनाउनु पर्छ ।' उनले भने ।

प्रचण्डले दाङलाई राजधानी बनाउँदा अन्य कोणबाट समेत फाइदा हुने दाबी गरे । उनले भने– 'यो परिवर्तनका लागि लडेकाहरुको भूमि हो । हिजोको आन्दोलनमा यो क्षेत्रका हजारौं नागरिक उर्लिएका थिए । उनीहरुको योगदानको कदर गर्न पनि दाङलाई राजधानी बनाउनु पर्छ ।'

प्रचण्डले दाङलाई राजधानी बनाउनु पर्नेमा जोड दिदै गर्दा मुख्यमन्त्री शंखर पोखरेल मुस्काउँदै कानेखुसी गर्दै थिए । मुख्यमन्त्री पोखरेल पनि दाङलाई नै राजधानी बनाउनु पर्ने पक्षमा छन् । पोखरेलको निर्वाचन क्षेत्र दाङ नै हो ।