४१ अण्डा खाँदा गयो ज्यान

जाउनपु (भारत) - भारतको उत्तर प्रदेशमा बाजी थापेको अण्डा खाँदाखाँदै एक जनाको मृत्यु भएको छ।

भारतीय प्रहरीले जनाएअनुसार उत्तर प्रदेशको जाउनपुर जिल्लामा ५० वटा अण्डा खाने बाजी लगाएकोमा ४२ औं अण्डा खाँदैगर्दा ४२ वर्षीय सुवास यादवको सोमबार मृत्यु भएको हो।

प्रहरीका अनुसार यादव र उनका साथीहरुबीच विवाद भइरहेको बेलामा बिबिगन्ज मार्केटमा अण्डा खाने बाजी राखिएको थियो। यादवले सोही क्रममा आफूलाई दुई हजार रुपैयाँ दिए ५० अण्डा खाने बाजी राखेका थिए।

साथीहरुले उसिनेको ५० वटा अण्डा ल्याएर यादवलाई खान दिएका थिए। ४१ अण्डा उनले राम्रैसँग खाएको र ४२ औं अण्डा खानका लागि मुखमा राख्दै गर्दा उनी बेहोस भएका थिए।

उनलाई तत्कालै नजिकको क्लिनिकमा लगिएको थियो। त्यहाँ सम्भव नभएपछि उनलाई सञ्जय गान्धी पोस्ट ग्राजुएट इन्स्टिच्युट अफ मेडिकल साइन्समा लगिएको र केही घण्टामै उनको ज्यान गएको प्रहरीले जनाएको छ। चिकित्सकले धेरै अण्डा खाएर यादवको मृत्यु भएको जनाएका छन्।