नेयमारविनाको पीएसजी पराजित

काठमाडौं - ब्राजिलियन स्टार खेलाडी नेयमार विनाको पेरिस सेन्ट जर्मेन (पीएसजी) पराजित भएको छ। फ्रेन्च लिग वान अन्तर्गत शुक्रबार राति भएको खेलमा पीएसजी रेलिगेशन जोनमा रहेको डीजोनसँग २-१ ले पराजित भएको हो। पीएसजीको जारी सिजनको यो तेस्रो हार हो। 

डीजोनले घरेलु मैदानमा सुरुवाती अग्रता भने पीएसजीले लिएको थियो। खेलको १९ औं मिनेटमा केलियन एम्बाप्पेले गोल गर्दै दिलाएको सुरुवाती अग्रता जोगाउन नसक्दा पीएसजी रेलिगेशन जोनमा रहेको क्लबसँग पराजित हुन पुग्यो। पहिलो हाफको ईन्जुरी समयमा मौनिर चौयरले गोल गर्दै खेल बराबरीमा ल्याए। त्यसपछि दोस्रो हाफमा घरेलु टोलिले थप एक गोल गर्दा पाहुना टोलिले भने कुनै गोल गर्न सकेन। खेलको ४७ औं मिनेटमा डीजोनका जोन्डर काडिजले विजयी गोल गरेका थिए।

यस जितसँगै डीजोनले दुई स्थान सुधार गर्दै अंक तलिकाको १८ औं स्थानमा उक्लिन सफल भएको छ। हारका बाबजुत पनि पीएसजी १२ खेलबाट २७ अंकसहित तालिकाको शीर्ष स्थानमा छ।