तीन खेल प्रतिबन्धपछि राष्ट्रिय टोलीमा फर्किए मेस्सी

काठमाडौं- स्टार स्ट्राइकर लियोनल मेस्सी अर्जेन्टिनाको राष्ट्रिय फुटबल टोलीमा फर्किएका छन्।

दक्षिण अमेरिकी फुटबल महासंघ (कोपा)ले लगाएको तीन खेलको प्रतिबन्धपछि मेस्सी राष्ट्रिय टोलीमा फर्किएका हुन्। 

गत साउनमा ब्राजिलमा भएको कोपा अमेरिकामा महासंघमाथि भ्रष्ट्राचारको आरोप लगाएपछि मेस्सीमाथि तीन महिनाको प्रतिबन्ध लागेको थियो। तेस्रो स्थानका लागि भएको प्ले अफ खेलपश्चात मेस्सीले महासंघमाथि भ्रष्टाचारको आरोप लगाएका थिए। मेस्सीले तेस्रो स्थानको पदक लिनसमेत अस्वीकार गरेका थिए। त्यसअघि सेमिफाइनलमा ब्राजिलसँग २-० ले पराजित भएपछि मेस्सीले ब्राजिललाई उपाधि जिताउन रेफ्रीले खेल मिलेमतो गरेको आरोप लगाएका थिए।

त्यसपछि महासंघले उनीमाथि तीन खेलको प्रतिबन्ध लगाएको थियो। प्रतिबन्धपछि कप्तान मेस्सीले चिली, मेक्सिको इक्वेडर र जर्मनीविरुद्धको मैत्रीपूर्ण खेल गुमाएका थिए।

अब उनी ब्राजिल र उरुग्वेसँगको मैत्रीपूर्ण खेलका लागि घोषणा गरेको टोलीमा फर्किएका छन्। अर्जेन्टिनाले नोभेम्बर १५ मा ब्राजिल र नोभेम्बर १८ मा उरुग्वेसँग मैत्रीपूर्ण खेल खेल्दैछ।

एजेन्सीकाे सहयाेगमा