'विभेदका पर्खालहरु द्रूतगतिमा भत्किँदैछन्'

काठमाडौं - भूमि व्यवस्था, सहकारी तथा गरिबी निवारण मन्त्री पद्माकुमारी अर्यालले विभेदका पर्खालहरु द्रूतगतिमा भत्किँदै गएको बताएकी छिन्।

मानवअधिकारका लागि महिला, एकल महिला समूहद्वारा सञ्चालित हाम्रो आधार बचत तथा ऋण सहकारी संस्था लिमिटेडको दशौं वार्षिक साधारणसभालाई आज (शुक्रबार) काठमाडौंमा सम्बोधन गर्दै मन्त्री अर्यालले महिलाका प्रगतिका बाधक विभेदका पर्खालहरू भत्किँदै गएको बताइन्।

'समाजमा रहेको विभेदहरू कम हुँदै गएको प्रसंगमा महिलाहरुमाथिको सामाजिक, आर्थिक, धार्मिक एवं सांस्कृतिक विभेदहरू कम हुँदै गएका छन्’, मन्त्री अर्यालले भनिन्। 

हिजो परनिर्भर बनेका महिला आज आत्मनिर्भर बन्नेतर्फ अगाडि बढिरहेको भन्दै उनले सिप सिकेर आत्मनिर्भर बन्ने अभियानमा दह्रो संकल्पसहित अगाडि बढ्न आग्रह गरिन्। घरभित्र बस्ने महिलाहरु व्यवसायी बन्दै गएको भन्दै उनले यस्ता गतिविधिले गौरवको अनुभूति हुने बताइन्।
 
मन्त्री अर्यालले सीप सिकेर व्यवसायिकतामा जान जोड दिइन्।