आलमलाई थप ८ दिन थुनामा राख्न आदेश : अनुसन्धान अन्तिम चरणमा

रौतहट- बम विस्फोट र इँटाभट्टामा हालेर व्यक्ति हत्या गरेको अभियोगमा पक्राउ परेका सांसद मोहम्मद अफताब आलमलाई थप ८ दिन थुनामा राख्न अदालतले आदेश दिएको छ । 

आलमलाई हिरासतमा राख्न अदालतले आज तेस्रो पटक म्याद थपेको हो । दुईपटक दिइएको समयमा अनुसन्धानले पूर्णता नपाएपछि आज तेस्रोपटक म्याद थपिएकाे हाे ।  

असाेज २६ गते  पक्राउ परेका उनलाई सुरुमा ७ दिन र गएको आइतबार थप ५ दिनको म्याद लिएर हिरासतमा राखिएको थियाे । उनी हाल रौतहट प्रहरीकै हिरासतमा छन् ।

अदालतबाट म्याद थप गरेर प्रहरीले उनीसँग बयान लिइसकेको छ । प्रहरीले अनुसन्धान करिब अन्तिम चरणमा पुर्याएको छ ।

प्रत्यक्षदर्शी र पीडितहरुले खुलेर घटनाबारे बताएकाले अनुसन्धानमा केहि सहजता आएको प्रहरीले जनाएको छ । रौतहट प्रहरी प्रमुख एसपी भूपेन्द्र खत्रीले अनुसन्धानसँग जोडिएका सबै सबुत प्रमाण संकलनकै क्रममा रहेको जानकारी दिए । 

जिल्ला प्रहरी कार्यालय रौतहटले १२ वर्षअघिको घटनासम्बन्धमा बयानका लागि नेपाल प्रहरीका दुई बहालवाला डीएसपीलाई झिकाएको छ । रौतहट प्रहरीले बयानका लागि डीएसपीद्वय राजीव बस्नेत र इन्द्र सुवेदीलाई उपस्थित गराइदिन मंगलबार प्रहरी प्रधान कार्यालयलाई पत्राचार गरेको हो ।

पूर्वमन्त्री आलमले पहिलो संविधान सभाको निर्वाचनको बुथ कब्जा गर्न केहि व्यक्तिलाई बम बनाउन लगाएका थिए । बम बनाउने क्रममा अचानक विस्फोट भएपछि केहिको घटनास्थलमै मृत्यु भएको थियो भने केहि घाइते भएका थिए । प्रत्यक्षदर्शीका अनुसार घाइते भएकाहरुलाई उनले इट्टा भट्टामा हालेर जिउँदै जलाइ हत्या गरेका थिए ।