सुनको अवैध कारोबार गर्ने २ भारतीयविरुद्ध मुद्दा

धनगढी - सुनको अवैध कारोबार गर्ने दुईजना भारतीय नागरिकविरुद्ध कैलाली जिल्ला अदालतमा मुद्दा दर्ता भएको छ। राजस्व अनुसन्धान विभाग क्षेत्रीय कार्यालय कोहलपुरले भारतको पलियाखिरी घर भई हाल धनगढी बस्दै आएका सुशील कुमार राजपुत र उनका छोरा अतुल वर्माविरुद्ध मुद्दा दर्ता गरेको हो। उनीहरुविरुद्ध आठ करोड बराबरको बिगो माग दाबीसहित मुद्दा दायर भएको जिल्ला अदालतका श्रेस्तेदार भुवन गिरीले जानकारी दिए। 

धनगढीमा सुनचाँदीको कारोबार गर्दै आएका दुवैजनाविरुद्ध राजस्व चुहावट र विदेशी विनीमय अपचलनमा मुद्दा दर्ता भएको उनले जानकारी दिए। गिरीका अनुसार गाडी, ठुलो मात्रामा भारतीय र नेपाली मुद्रा, मोवाईल लगायतका सामानसहित पक्राउ परेका उनीहरुको खर्च अस्वभाविक देखिएपछि अनुसन्धान विभागले आठ करोड बिगो माग दाबी गर्दै मुद्दा दर्ता गरेको हो।

उनीहरु धनगढीको शुभम् सुनचाँदी पसलका सञ्चालक हुन्।