गायक दुर्गेश थापा प्रहरीको खोजीमा 

काठमाडौं- देउसी भैलोसम्बन्धी गीतका कारण विवादमा तानिएका गायक दुर्गेश थापा प्रहरीको खोजीमा परेका छन् । उनीविरुद्ध उजुरीपछि प्रहरीले खोजी गरेको हो । 

उनले गाएको देउसीसम्बन्धी गितमा राखिएको केहि शब्दप्रति आपत्ति जनाउँदै उनीविरुद्ध उजुरी परेको हो । उजुरीपछि प्रशासनले महानगरीय अपराध महाशाखा टेकुलाई गायक दुर्गेश थापालाई झिकाउन निर्देशन दिएको छ । 

महाशाखा प्रमुख सहकुल थापाले दुर्गेशलाई प्रहरी कार्यालयमा बोलाइएको जानकारी दिए । उनले नेपाल समयसँग भने- 'हिजो मात्रै उनीसँग फोन सम्पर्क भएको छ । हामीले प्रहरी कार्यालयमा आउन भनेका छौ । हेरौ आउनु हुन्छ होला ।' 

उनले गाएको देउसीसम्बन्धी गीतमा  ‘ए निकाल गाँजा, खानुपर्छ आज’ भन्ने अंश समावेश छ । जुन कानूनी रुपमा गलत भएको उजुरीकर्ताको दाबी छ । उनले गीतमार्फत तिहारका बेला वियर खाने प्रचार गरेको भन्दै सामाजिक संजालमा पनि आलोचना भएको थियो । 

तिहारको गीतमा दुर्गेशले गाएका छन्- डन आयो डन, जा मूला भन्, राजा हो राजा, बजाइदिन्छ बाजा, ए निकाल गाँजा, खानुपर्छ आज !