तेस्रो पटक सफलताका साथ कलेजो प्रत्यारोपण

काठमाडौं - त्रिभुवन विश्वविद्यालय शिक्षण अस्पतालले तेस्रो पटक सफलताका साथ कलेजो प्रत्यारोपण गरेको छ। जेठ १८ गते पहिलो र साउन ३ गते दोस्रो पटक सफल रुपमा कलेजो प्रत्यारोपण गरेको शिक्षण अस्पतालले शुक्रबार तेस्रो पटक सफलताका साथ कलेजो प्रत्यारोपण गरेको हो।

रुपन्देहीका २७ वर्षीय छोराले ५० वर्षीय बुबालाई दिएको कलेजो प्रध्यापक डा. रमेशसिंह भण्डारीको टोलीले सफलताका साथ प्रत्यारोपण गरेको हो। डा. भण्डारीले 'नेपालमा स्थायी कलेजो प्रत्यारोपण कार्यक्रमका लागि आशाको छोटो किरण' देखिएको प्रतिक्रिया दिएका छन्। उनले अब कलेजो प्रत्यारोपण बिस्तारै नियमित बनाउने योजना रहेको बताए। 

नेपालमा २५ लाख रुपैयाँको हाराहारीमा कलेजो प्रत्यारोपण गर्न सकिने डा भण्डारीले बताए। डा भण्डारीका अनु्सार परिवारभित्रकै नजिकैको व्यक्तिले मात्र कलेजो दान गर्न सक्छन् भने रक्त समूह पनि मिलेको हुनुपर्छ।