'आँखा खोलेर हेरौं जनताका लागि धेरै काम भएका छन्'

काठमाडौं - प्रधानमन्त्री केपी शर्मा ओलीले सरकारले केही काम गर्न सकेन भनेर आलोचना गर्नेलाई आँखा खोलेर हेर्न आग्रह गरेका छन्। नेपाल कम्युनिष्ट पार्टी (नेकपा) ले बडादसैं, तिहार, नेपाल संवत्, छठलगायत पर्वका अवसरमा बुधबार आयोजना गरेको चियापान तथा शुभकामना आदानप्रदान कार्यक्रममा सम्बोधन गर्दै उनले आफ्नो स्वार्थका कारण आँखा चिम्लिनेहरुले सरकारबाट भएका काम नदेखेको आरोप लगाए।

"केही पनि भएन भन्नेहरुको आफ्नो स्वार्थ होला, तिनीहरुले आँखा चिम्लेर हेरेको हुनसक्छ, आँखा खोलेर हेर्दा जनताका लागि धेरै काम अगाडि बढेका छन्।", ओलीले भने। जनाताका लागि सरकारले थुप्रै उल्लेखनीय कार्य गरेको भन्दै उनले भने, “जनताका लागि धेरै काम भएका छन्। जस्तै बृद्ध भत्ता बृद्धि, बिजुलीमा जनताको लगानी, पोखरा र भैरहवा विमानस्थल, द्रुत मार्गको निर्माण, पेट्रोलियम पाइपलाइनको सुरुआत, सयौँ पुल निर्माण, कोशीमा स्टिमर सञ्चालन, वैदेशिक लगानीमा वृद्धि, चिनियाँ राष्ट्रपति सी जिनपिङको नेपाल भ्रमण,  बुटवल–गोरखपुर अन्तरदेशीय प्रसारण लाइन निर्माण कार्यलगायत छन्। ”

छिमेकी मुलकसँगको सम्बन्ध सुधार र मुलुकभित्र नयाँ नयाँ आयोजनाको थालनी गरेर नेपाल विकास र समृद्धिको नयाँ बाटोमा अघि बढेको प्रधानमन्त्री ओलीले दाबी गरे। उनले  हाम्रो देश हामीले नै बनाउने हो भन्दै कानूनी राज्य पालना, सुशासन कायम र भ्रष्टाचारमुक्त र संस्कारयुक्त समाज निर्माण गर्न सबै लाग्नुपर्ने बताए।