एनआरएनएको चुनाव आज, पन्त र आचार्यको प्यानल मैदानमा

काठमाडौं- गैरआवासीय नेपाली संघ (एनआरएनए) को नयाँ नेतृत्व चयनका लागि आज (बुधबार) काठमाडौंमा निर्वाचन हुँदैछ । 

संघको नवौं अन्तर्राष्ट्रिय महाधिवेशनबाट नयाँ नेतृत्व चयनका लागि ४२ जना पदाधिकारीको निर्वाचन हुन लागेको हो ।

त्यसका लागि मनोनय दर्ता मध्याह्न १२ बजेसम्मका लागि खुला गरिएको एनआएरनए प्रतिनिधिले बताएका छन्। मतदान आजै साँझ ५ बजेबाट सुरु हुने बताइएको छ । मतदान प्रक्रिया राति १० बजेसम्म चल्ने भएको छ । 

संघको नयाँ नेतृत्वका लागि वर्तमान उपाध्यक्षद्वय कुमार पन्त र कुल आचार्य प्यानलसहित चुनावी मैदानमा देखिएका छन् । 

आचार्यको बेलायत तथा पोर्चुगलमा चेन रेष्टुराको व्यवसाय छ भने पन्त जर्मनीको आर्थिक राजधानी फ्रैंकफर्टलाई आधार बनाएर होटल तथा रेष्टुरा व्यवसाय सञ्चालन गर्दै आएका छन् । 

गैर आवासीय नेपाली संघ ८० भन्दा बढी मुलुकमा फैलिएको दावी गरिए पनि ४९ देशबाट आएका झण्डै २६ सय प्रतिनिधिहरुले नयाँ नेतृत्व चयनका लागि मतदानमा भाग लिँदैछन् । निर्वाचन समितिले मतदाताहरुको अन्तिम नामावली पनि आजै प्रकाशित गर्ने जनाएको छ ।