विमानस्थलमा तोडफोड गर्ने सांसद साह पक्राउ

काठमाडौं- जनकपुर विमानस्थलमा तोडफोड गरेका प्रतिनिधि सभा सांसद प्रमोद साहलाई प्रहरीले पक्राउ गरेको छ । 

नागरिक उड्डयन प्राधिकरण कार्यालय जनकपुरले मंगलबार जिल्ला प्रहरी कार्यालय धनुषामा जाहेरी दर्ता गराएसँगै सर्लाही निर्वाचन क्षेत्र नम्बर १ बाट निर्वाचित राजपा सांसद साहविरुद्ध पक्राउ पुर्जी जारी भएको थियो । धनुषा प्रहरीको अनुरोधमा जिल्ला अदालत धनुषाले साहलाई पक्राउ गर्न आदेश दिएको थियो ।

त्यसको केही बेरमै सांसद साह त्रिभूवन अन्तर्राष्ट्रिय विमानस्थल, काठमाडौंबाट पक्राउ परेका हुन्। ​​​​​​सोमबार ​काठमाडौं आएका सांसद  साह मंगलबार सर्लाही फर्कन विमानस्थल पुगेका बेला उनलाई प्रहरीले पक्राउ गरेको हो।

सांसद साहले फेसबुकमार्फत आफू पक्राउ परेको जानकारी दिएका छन् ।

प्राधिकरणको जनकपुर कार्यालयले सांसद साहमाथि तोडफोड गरेको तथा वाधाअवरोध सृजना गरेको भन्दै गैर सैनिक हवाई उडान ऐन २०१५ अन्तर्गत मुद्दा दर्ता गरेको धनुषाका प्रहरी उपरीक्षक शेखर खनालले जानकारी दिए । 

जिप्रका धनुषामा मुद्दा दर्ता भएसंगै सांसद साहलाई पक्राउ गर्न काठमाडौं प्रहरी कार्यालयलाई जानकारी गराईएको थियो। 

सम्बन्धित समाचार:  राजपा सांसद साहद्वारा जनकपुर विमानस्थलमा तोडफोड