पक्की पुल माग्दै थालेको अनशन ३७ औं दिनमा स्थगित

धनगढी- बैतडीको झुलाघाट नाकामा पक्की पुल निर्माणको माग गर्दै गरेको स्थानीयको रिले अनशन ३७ दिनपछि स्थगित भएको छ।

झुलाघाट नाकामा पक्की पुल निर्माणको एक सूत्रीय माग गर्दै गएको भदौ २२ गतेदेखि जिल्ला प्रशासन कार्यालय अगाडि अनशन थालिएको थियो। 

झुलाघाट पक्की पुल निर्माण संघर्ष समितिले सोमबार प्रेस विज्ञप्ति जारी गरी काठमाडौं केन्द्रित आन्दोलन गर्ने भन्दै रिले अनशन स्थगित गरेको जनाएको छ। 

३७ दिनसम्म रिले अनशन बस्दा पनि आफूहरुको माग प्रति सरकारले कुनै चासो नदिएकाले अब आन्दोलनलाई थप सशक्त बनाउन हाललाई स्थगित गरिएको संघर्ष समितिका संयोजक नरबहादुर चन्दले बताए। 

अनशन बसेको ३७ दिनसम्म पनि सरकारले कुनै प्रतिक्रिया नजनाउनु दुर्भाग्यपूर्ण भएको स्थानीय आक्रोषित छन्।