भारतीय कुटनीतिज्ञको टिप्पणी : नेपाल चीनसँग नजिकिने ‘जोखिम’

काठमाडौं- चिनियाँ राष्ट्रपति सी जिनपिङको दुई दिने नेपाल भ्रमणबारे एकजना भारतीय पूर्व राजदूतले नेपालबारे ‘अप्रिय’ अवधारणा अघि सारेका छन्।

सीकाे नेपाल भ्रमणले नेपालको दीर्घकालीन विकास साझेदारीमा कोशेढुङ्गा साबित हुने आम नेपालीको भरोशा बढिरहेको बेला ती कुटनीतिज्ञकाे अप्रिय भनाइ आएकाे हाे। उनको भनाइमा नेपाल र चीनबीच दुईपक्षीय सम्बन्ध विस्तार हुँदा नेपालको भारतसँगको निर्भरता घट्ने र चीनसंग नेपाल नजिकिने ‘जोखिम’ औँल्याएका छन्। 

एउटा भारतीय टेलिभिजनको विमर्श कार्यक्रममा ईरान र संयुक्त अरब इमिरेट्सका लागि भारतीय राजदूत केसी सिंहले भनेका छन, ‘नेपालसँग हाम्रो खुला सीमा छ। वस्तुहरु भित्रिइरहेका छन्, नेपालले आयात गरिरहेको छ, झन्डै आधा–आधा, आधासरो भारतबाट, केही हवाई मार्गबाट र केही सिधै। यदि यो सन्तुलन फेरियो भने नेपालले सिधै वस्तुहरु आयात गर्नेछ। त्यसपछि हामीले नेपालमाथि बेलाबेलामा पेच कसेर मनोवैज्ञानिक दवाब बनाईराख्ने हाम्रो ब्यवस्था हट्ने छ। त्यहाँ माओवादी, कम्युनिष्टको सरकार छ हामीले यो कुरा भुल्न हुँदैन। त्यसैले, सीको नेपाल भ्रमणले दिने त्यो संकेत एकदमै महत्व छ। मलाई थाहा छैन हामीले यस्तो घटनाक्रमलाई कसरी प्रतिकार गर्ने?’