रोनाल्डो सात सय गोल नजिक  

काठमाडौं- स्टार खेलाडी क्रिस्टियानो रोनाल्डो आफ्नो फुटबल करियरकै ७ सय गोल नजिक पुगेका छन्। शुक्रबार राति भएको युरोकप छनोटमा लक्समवर्गविरुद्ध भएको खेलमा एक गोल गर्दै उनी आफ्नो ७ सय गोलको नजिक पुगेका हुन्। उनले ६ सय ९९ गोल पूरा गरेका छन्। यससँगै रोनाल्डोले पोर्चुगिज राष्ट्रिय टोलीका लागि ९४ औं गोल समेत पूरा गरेका छन्।

सन् २०२० मा आयोजना हुने युरोकप छनोटमा पोर्चुगलले लक्समवर्गमाथि ३-० गोलको सहज जित निकाल्दा रोनाल्डोले एक गोल गरेका थिए। त्यस्तै पोर्चुगलको जितमा बेर्नार्डो सिल्भा र गोन्कालो गुएडेसले पनि एक–एक गोल गरेका थिए। घरेलु मैदानमा सिल्भाको गोलबाट पोर्चुगलले १६ औं मिनेटमा अग्रता बनाएको थियो। ६५ औं मिनेटमा कप्तान रोनाल्डोले गोल गर्दै पोर्चुगलको अग्रता २-० को बनाए। त्यसपछि खेलको ८९ औं मिनेटमा गुएडेसले गोल गर्दै पोर्चुगललाई ३-० को जित दिलाए। 

जितसँगै पोर्चुगल युरोकप छनोट नजिक पुगेको छ। समूह ‘बी’को पोर्चुगलले ५ खेलमा ११ अंक जोडेको छ। र, समूहको दोस्रो स्थानमा छ। लक्समवर्ग ६ खेलमा ४ अंक जोडेर चौंथो स्थानमा छ। यस समूहमा युक्रेन ६ खेलमा १६ अंक जोडेर शीर्ष स्थानमा छ। युक्रेनले शुक्रबार राति लुथनियालाई २-० ले हराएको छ।

– एजेन्सी