सीका लागि साढे दुई घन्टा विमानस्थल ठप्प

काठमाडौं- चिनियाँ राष्ट्रपति सी चिनफिङ नेपाल आउँदा र जाँदा साढे दुई घन्टा त्रिभुवन अन्तर्राष्ट्रिय विमानस्थल विमानस्थल बन्द हुने भएको छ। 

त्रिभुवन अन्तर्राष्ट्रिय विमानस्थल नागरिक उड्डयन कार्यालयले नोटाम जारी गर्दै शनिबार र आइतबार साढे दुई घन्टा विमानस्थल बन्द हुने जनाएकाे छ। नोटाम भीआईपीको आगमनपूर्व उडान तथा अवतरणमा पर्न सक्ने सम्भावित प्रभावबारे एयरम्यानलाई जानकारी दिन जारी गरिने सूचना हो। नोटाम अनुसार विमानस्थल शनिबार दिउँसो २ः५५ देखि साँझ ५ः२५ सम्म र आइतबार बिहान ११ः२० देखि दिउँसो १ः५० सम्म विमानस्थल बन्द हुनेछ। 

कार्यालयले यसबीचमा प्रभावित हुने सबै उडानको तालिका समेत सार्वजनिक गरेको छ।  

राष्ट्रपति सी नेपालको दुईदिने राजकीय भ्रमणका लागि भारतबाट एयर चाइनाको विमानमा शनिबार नेपाल आउँदैछन्। उनी आइतबार स्वदेश फर्कने कार्यक्रम छ।