फुटबल टोली अस्ट्रेलियाबाट जोर्डन प्रस्थान

काठमाडौं- नेपाली राष्ट्रिय फुटबल टोली अस्ट्रेलियाबाट शुक्रबार जोर्डन प्रस्थान गर्दैछ।

फिफा विश्वकप छनोटअन्तर्गत एसिया दोस्रो चरणको छनोट खेलका लागि नेपाली टोली त्यसतर्फ प्रस्थान गर्न लागेको हो। 

नेपालले सुरुवाती तीन अवे खेल खेलिसकेको छ। समूह ‘बी’ मा रहेको नेपालले असोज २८ गते आफ्नो अन्तिम अवे खेल खेल्दै छ। नेपाल र जोर्डनबीचको खेल अम्मान अन्तर्राष्ट्रिय रंगशालामा असोज २८ गते राती ९ः४५ बजे सुरु हुने छ। उक्त खेलका लागि नेपाली टोली शनिबार जोर्डन पुग्नेछ। 

यसअघि नेपाल र जोर्डनले सन् २०११ मा विश्वकप छनोटमा प्रतिस्पर्धा गरेका थिए। छनोटको खवे खेलमा नेपाल जोर्डनसँग ९-० ले पराजित भएको थियो भने घरेलु मैैदानमा १-१ को बराबरी खेलेको थियो। 

समूह ‘बी’ मा नेपालले पहिलो खेल कुवेतसँग ७-० ले पराजित भएको थियो भने दोस्रो खेलमा चाइनिज ताइपेसँग २-० को जित निकालेको थियो। त्यस्तै तेस्रो अवे खेलमा नेपाल बलियो टोली अस्ट्रेलियासँग ५-० गोलले पराजित भएको थियो। जोर्डनसँगको अन्तिम अवे खेलपछि नेपालले बाँकी चार खेल घरेलु मैदान दशरथ रंगशालामा खेल्ने छ।